金融High Tea 2016年12月30日
候低買強股
2016年12月30日
美股杜指兩萬點關阻力真係唔簡單，雖然指數只差幾十點，但聖誕假後攻堅無效，翌日即刻跌番111點，能否喺今年成功衝關，就要睇好友跟住兩個交易日嘅意志嘞。美股高位回調，再加埋夜晚傳出人民幣喺外圍失守七字關口，好多人以為港股會有險情，但係重磅藍籌力頂下，個市轉跌為升，可見基金托住指數埋年嘅意願未減。
破七驚魂假中有真
昨日大市最戲劇性嘅消息，應該係彭博係前晚顯示人民幣在岸價破7，消息一出人民銀行好快就否認，而且大力炮轟，事後睇根本有叫價無成交，外電喺呢啲敏感課題搞啲咁嘅誤差，真係唔怪得阿爺火滾兼懷疑有陰謀。
不過，匯市兵不厭詐，人仔呢次「假穿底」已經產生左好大嘅心理效應，就算人行出嚟反駁，都難改人仔持續弱勢，離岸價於昨日亞洲交易時段跌穿6.98兌1美元，再創新低，每百港元兌人民幣於外匯市場首度見90，早前在本港找換店已出現90的兌換價。
中環茶友話，聖誕新年係匯市交投淡薄日子，過往好多時都會發生大屠殺式嘅波動。今次人仔喺在岸價搞出「假穿底」，喺時間上唔令人意外，呢單消息雖然無真料落鑊，但就成功將市場聚焦喺新年初人仔嘅匯價走勢上。由於美元轉強加上美債債價回落，估計未來中國外匯儲備仍會以較快速度回落，所以傳話人仔破7又係假中有真，方便炒家搵機會踩多兩腳。
本來美股無力破關加上人仔腳軟，港股正路應該要跌，但基金見今年仲有兩個交易日，點都要出力做吓粉飾櫥窗，重點掃入騰訊(700) 等重磅股力撐大市，結果恒指昨日跌近160點後見底回升，全日升左36點，收報21790點。國企指數升12點，收報9312。
阿爺點都要益吓基建股
大市成交繼續係525億元的低水平，但「北水」繼續南下，滬港通南向資金錄得36.6億元人民幣，深港通南下資金則錄得4.35億元人民幣。藍籌最大升幅嘅騰訊升2.2%，報187.6元，單計騰訊已為恒指帶來47點升幅，周三受「北水」推高的建行(939) 升勢暫時止步，收市報5.89元，無升跌。
2016年即將過去，港股走勢要到下月初先見真章，如果要打穩陣波，都係等佢回落買啲底子較強嘅股份。有茶友問乜嘢叫做底子較強嘅股份呢？其中一個例子係生意會做得好啲嘅行業同公司。舉個例，呢排有啲資金入市買基建股，主要係內地雖然話唔強求保6.5%嘅增長，但要有咁上下嘅增長都唔易，故此好大機會要用投資拉動。雖然好多分析話內地嘅大型基建大致已經完成，但有官員就回應話中國咁大，要起總會搵到啲嘢起嘅。
內地積極推動各種公路鐵路項目，投資金額已逾萬億元人民幣，成為內地明年穩經濟增長的重要政策。若以總投資金額計，運輸及城市基建兩個行業得益最大，佔超過一半，由於中國鐵路總公司正推進中西部地區鐵路建設，有分析就覺得中鐵建(1186) 工程承包特別是來自公路、鐵路及城市軌道業務佔比重，可以留意。
今年以來，鐵建新增定單增長逐季加快，第三季按年增長36%，較第一及第二季的分別增長16%及20%為快。公司最近亦頻頻中標，相信可帶動盈利增長，該股第四季開始股價上升不少，但12月已跟隨大市回吐近一半。昨日鐵路基建股繼續強勢，中車(1766) 升1.6%，收造6.98元；中鐵建上漲0.9%，重上10元關口，等佢喺一月份回吓，咪可以等機會買到呢類生意有保障嘅大股囉。
陸羽仁
金融High Tea 舊文
來源 source: http://hdfin.stheadline.com
