自成一格：
Uber司機變ISIS炸彈人？
■香港地方細，Uber司機唔算好賺錢。 資料圖片
香港地方細，交通四通八達，加上的士霸權下，Uber司機唔算好賺錢。不過在美國，好似洛杉磯呢啲大城市，公共交通規劃仍然只停留在市中心，周邊城市根本上唔揸車去唔到，所以呢邊啲Uber司機個個賺
到肥仔咁，但係賺到錢同時，其實好多司機都好驚驚。
早兩日收到線報，話環球影城個地鐵站會有恐襲，全城警察軍人FBI都出動埋去守地鐵站。越野兔咁啱周末先去完，個地鐵站根本就搵個人望嚇都無，你係恐怖分子都唔炸呢度啦！分分鐘炸完都無人知。
當日同個Uber司機吹水，佢覺得遲早有一日，啲恐怖分子會搭Uber去放炸彈，又或者利用UberEATS送外賣功能，炸彈扮漢堡包送去最旺場的地方，然後一次過引爆，到時連派個人玩自殺式爆炸都唔使，直接叫個Uber司機去送死。佢嘅幻想其實真係有可能，事關上個月先係紐約拉咗個穆斯林Uber司機，想學尼斯恐襲咁搞紐約市。
今個禮拜初，四間科網龍頭facebook、Twitter、YouTube及Microsoft手牽手搞個「Fingerprints」數據庫，想收集恐怖份子的資料，以及阻止有關訊息在網上流傳開去，只不過咁，恐怖分子有幾可會俾你收集到堅料？玩突襲、防不勝防先夠noise，所以派Uber司機做炸彈人真係遲早嘅事囉。
越野兔
https://www.facebook.com/Sailorrabbit/
本欄逢周五刊出
越野兔
自成一格 - 越野兔 舊文
來源 source: http://hk.apple.nextmedia.com
