炒得癲 遲早還
2016年12月09日
美元美股強對香港係雙刃劍，因為美元持續強勢、人民幣貶值及資本外流壓力持續，人民銀行日前就公佈，中國外匯儲備連續五個月縮水。消息下受惠於人仔貶值潮的保險股王友邦(1299) 股價一開就腳軟。
據人民銀行公佈，截至今年11月底外儲總額為3.052
萬億美元，較上月減少691億美元，創下今年1月份以來最大跌幅，與2014年6月外儲3.99萬億美元的歷史高位相比，在過去兩年半時間內，中國外儲累計縮水逾9400億美元，唔見咗24%，11月整體外儲規模已降至2011年3月以來最低水平。消息出嚟後，市場分析家擔心年底中國外儲3萬億美元關口隨時失守，明年人民幣兌美元恐很快便破7算，料中國對資本流出政策會進一步收緊。
保險股風水輪流轉
外儲跌得急，國家外管局負責人出嚟解畫時自然想派定心丸，解釋話央行向市場提供外匯資金，以調節外匯供需平衡、美國大選後非美元貨幣對美元匯率總體呈現貶值、債券價格回調等多種因素，導致期內外儲規模下降，加上支持「走出去」等方面的資金運用，都令外儲帳面出現減少。雖然外管局係咁派定心丸，實際上中央就在不斷出招力控外匯流失。早前內地宣佈多項措施限制境外收購，呢兩日又傳出進一步限制內地人來港買保險。原先內地人可用銀聯卡同其他信用卡買保險，中央先就出招限制銀聯卡，O依家講緊就連其他信用卡都收緊，消息公佈就令友邦股價開市即跌。
友邦喺內地人來港買保險下食正條水，股價一度衝破50元大關，隨着收緊限制股價轉勢。有人就問呢排保險股乜唔係升緊咩？本港保險股有幾類，內險股主要係做內地市場，投資回報跟內地息口同A股，呢排深滬股市好咗，所以內險股有得升。至於國際保險股宏利(945) 喺香港生意都好大，但佢覆蓋範圍主要係美加，而且佢有不少外國投資，美息低迷搞到佢衰咗好多年，O依家話利率向上，咁就對佢有利，所以風水輪流轉，帶挈佢呢排屢創新高，昨日又升收138元，升咗2元，升幅1.5%。相比下，友邦就受內地客政策影響最大，所以喺其他保險股好景下，佢反而唔係幾得。
在內地限資陰影下，港股升幅遠遜美國杜指嘅298點，恒指收報22861點，僅升60點；國企指數收報9896點，漲67點；紅籌指數收報3772點，升32點，成交735億元。呢兩日好威嘅滙控(005) 先升後跌0.2%，收報65.35元；友邦保險逆市跌1.9%，收報44.25元。
半新股隨時變散戶陷阱
市場資金唔係咁多，資金搵唔係咁犯本嘅細股炒，幾隻半新股由隻膳源(1632) 打頭陣造好個勢，上市7日一度升7倍，帶動半新股周三包攬港股升幅榜首六位，仲帶挈近期開招的蚊型新股熱賣，昨日首掛的進昇集團(1581) 公開發售超購530倍，市日一度升上0.82元，較招股價0.6元升逾三成，收市升幅大縮水至0.65元；俊盟國際(8062) 前日孖展截飛，超購逾830倍。
膳源喪炒後市值一度躍升超過30億元，超越同業翠華(1314) ，竟然逼近大快活(052) ，認購新股一手帳面若無沽周三最高時可賺逾3萬元。資金輪流炒起半新股，盟科控股(1629) 繼前日升28%後發力爆上，由「毫子」股變「蚊」股，一度升近1.4倍，見上市新高2.14元，收市報1.65元，升19%。
其他蚊型半新股好似10月中上市的東盈控股(2113) ，及9月底上市的迅和集團(1591) ，昨日均是急升後倒插，主要係膳源昨日開始插水，收市跌咗35%，收11.04元。唔好睇呢啲半新股急跌就覺得好抵，通常呢類喪升股嘅殺人機制係狂升後急插，博散戶入市炒反彈，跟住彈少插多，沿途綁住大批股民以便散水。近年散戶中過招，好多人都唔敢博反彈，搞到呢啲喪股半天吊。無實質齋炒的股價瘋狂過後，必定要償還代價，差別只係邊個最後接棒埋單而已。
陸羽仁
金融High Tea 舊文
來源 source: http://hdfin.stheadline.com
