金手指：
英鎊根本沒有鐵底
■英鎊由脫歐公投後開始悲觀式下跌。 資料圖片
呢期滙率主導一切，孫柏文身處英倫，又見曾淵滄博士的《人民幣鐵底在哪裏》，今日就講英磅同人民幣。首先，美元強勢似會持續。先有市場預期佢哋今年會加三次息後，周末忽然有聯儲局成員話，有機會加多過三次。
講人民幣，我對
自己嘅預測力感安慰，原因係經多年努力後，我已達曾博士嘅級數。昨拜讀博士篇文，佢話：「我也不認為有所謂『鐵底』的指標保衞戰。」即唔好問博士個「鐵底」喺邊。我一睇，完全反映我嘅想法，因我都唔知「鐵底」喺邊。
點都好，我確實要讚嚇中央同人行。其他國家啲貨幣被拋售，央行打保衛戰時，好鍾意妖魔化啲沽家。國外嘅，就叫大鱷等；國內就輕則都標籤為叛國賊。不過今次大陸冇咁做。
好似我呢啲拋空離岸人民幣嘅人，佢純粹將利息挾到過百厘，而冇話我係漢奸或要充公回鄉證。而國內沽人民幣嘅人，中央都話明白強國人想將資產分散啲，不過瘋狂落閘希望大家慢慢來。即就算動粗，都係君子式咁揼，真係開始有世界級帝國風範。不過息挾到百厘，都係升得嗰少少，大鑊。
英鎊則由英國舊年中公投脫歐後，悲觀式咁跌，我都估緊鐵底喺邊。最大變數，係歐盟會否想傷己去殺英儆法、荷、意等。英帝官僚仲有三分釘，唯一有效談判籌碼，就係要令歐盟知佢走時會唔傷，而唯一方法，就係要同他國傾好貿易協議，一旦正式脫，會有其他國家保住佢。所以，要睇實美國、澳洲政府等，佢哋開始傾緊，如有風傾得成，英鎊就會係鐵底瞓身買之時。2017外滙會好好炒。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
