Can Bank：
買樓首要考慮條件
■位於市區的啟德1號2期，收票反應比同期推出的元朗新盤熱烈。 資料圖片
美國踏入加息周期，去年底開始有唔少分析認為，今年樓市將會向下，但真正為樓盤定價嘅發展商又係唔係咁睇？上周兩個發展商均為旗下新盤開價，由於兩個盤均是同一個項目2期單位，
價格相對容易比較。
其中位於市區、中海外（688）旗下的啟德1號2期開價較一期高15%；至於新地（016）旗下Grand Yoho2期開價則貴過1期兩成，兩盤兩期推售時間相隔均約半年，一個位於啟德，另一個位於元朗。經過周末收票，反應一個熱烈，另一個相對冷清。
傳統智慧之下，買樓首要條件係地點，次要條件係地點，再其次條件亦都係地點，點解新地可以咁勇，元朗盤都可以開出九龍價？呢個涉及另一個買樓傳統智慧，就係發展商嘅品牌。新地過往信譽佳、建築用料靚，所以開價一直都有溢價，而新地銷售策略，過去亦一直會「攞盡」這個「溢價」，情況稱得上是「測試」市場肯畀幾多溢價嘅程度。
但今時今日嘅市場，連劏房都衝去買，有幾多真係會理你品牌有幾好？信譽有幾高？今日嘅市場，喺冇得揀嘅時候，只有焗畀呢個品牌溢價，有得揀嘅自然會以地點呢個首要條件作衡量，我理得你個用料有幾靚吖。呢點亦令到新地經過周末之後，不得不重新部署。
咁係唔係代表樓價會向下？新地最新部署只係將貨源限制，講明首批只有200夥，而非提供更多優惠去吸引客源。好明顯，發展商仍未覺得樓價會跌，最少短期內唔會。
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com
