財金冒險號：
美元今年或會見頂
■全球通縮威脅解除，美元於今年內見頂的機會大。 資料圖片
特朗普當選以來，美元指數最多累升6%，最近卻偏軟，上周五佢話「美元太強」，更令美金應聲下挫，由高位回落3%。小生於7月28日寫過：「特朗普要花錢於軍隊及基建，會做大花筒……貨幣加財政寬鬆，結
果會係美元轉弱……近幾個美元周期，升勢大約維持六年，此輪升浪始於2011年，強勢應到2017年為止，特朗普上台會係轉捩點」，但估唔到人未上任，美元可能已見頂。
當然，美元仍有可能終極一升至真見頂，視乎特朗普推行基建及減稅進度，越快手越順利，美金越有力上。無論如何，美元年內見頂的機會極大，因全球通縮威脅已解除，聯儲局以外的央行亦有條件收水。
睇嚇歐洲，PMI顯示經濟復蘇，剛出爐嘅12月份通脹急升，其中大哥德國通脹升至1.7%。就算只計核心通脹，歐元區已擺脫通縮。英國就更犀利，未脫歐，英鎊先大貶，就此推高通脹至1.6%，央行預期年底升至2.7%。新興市場都一樣，俄羅斯隨油價翻身，中國PPI則大反彈，勢將輸出通脹到其他國家。
總言之，美元升勢已包含「眾人皆鬆我獨緊」的貨幣政策預期，但通脹已非美國獨有，只要其他主要央行稍為收緊貨幣政策，美元就會轉弱。鍾意去旅行嘅港人，不妨趁港元強，買定日圓、book定酒店，今年飛多幾轉日本啦！
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
