中環在線：里昂批流年
葉劉旺薯片差？
■里昂高級研究專員湯凱傑（右）同高級投資分析員馬卓藍噚日公佈風水指數。
中信里昂證券每年年頭一定公佈「風水指數」報告，特首選戰乃2017年香港頭號大事，中信里昂亦湊熱鬧，向幾位已經表態有意參選嘅人士贈番幾句。
暫時開咗聲，話想玩特首跑馬仔嘅有林
鄭月娥、葉劉淑儀、薯片叔叔曾俊華同胡國興4位，中信里昂承認冇水晶球預言到邊個跑出，但單憑4人生肖睇，就以1950年出世、屬金虎嘅葉劉今年運程最旺。中信里昂話，屬自僱人士嘅葉劉，雞年可謂佔盡天時地利，仲會驛馬星動，忙於外出奔走爭取支持咁話。
話林鄭 胡官運勢普通
至於雞年最黑仔，就要數屬兔嘅薯片叔叔，中信里昂提佢尤其要小心家庭方面；另外，雖然薯片喺政治階梯上有可能向上行多步，不過事態喺年初有可能急轉彎，轉好定轉壞就講唔埋。
對於被傳獲得欽點嘅林鄭，同被指陪跑嘅胡國興，sorry，中信里昂冇多講，淨係話二人雞年運勢普普通通，10分滿分只有4分。
講咗咁多，中信里昂以往準唔準先？睇番猴年往績，中信里昂都算估得幾準，計到特朗普運程麻麻，但就可以黃袍加身，佢大選前確係醜聞纏身，之但係被一致睇死嘅侵侵，最終爆冷成功當選。
唔知今年被批運滯嘅薯片，又會唔會同侵侵一樣，搞到一地眼鏡碎呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
