美金回調夾高港股
2017年01月19日
即將就任嘅美國總統特朗普不愧係「口水戰之星」，未上任就意見多多，搞到全球投資市場多咗好多炒作藉口。佢入主白宮前忽然出口術，話美金太強，即刻搞到美元下插，近排反彈緊嘅人民幣再急彈六百點子，港股跟住就炒高咗二百幾點。
我早前講過聯邦儲備局主席
嘅伯南克公開講話，明笑特朗普話內地操控匯價，人為壓低人民幣嘅說法，有違大家見到北京力頂人民幣嘅事實。轉過頭，特朗普就示範口術操控美匯，打開口牌話美元匯價太高，佢咁一講完美匯就掉頭向下，人仔隨即反彈。中環茶友笑言，阿爺夾人仔夾到身水身汗，無諗過突然間美國總統會幫手托一托，呢鋪真係要多謝佢。
新總統作風老派
特朗普嫌美元匯價太高，其實同佢嘅老式生意人作風好一致。特朗普係做傳統地產生意，諗嘢仲係好傳統，好似話閂大門自己做工廠。同樣地，認為弱美元有利貿易，都係傳統嘅想法，佢話內地操縱匯價俾伯南克訕笑，佢照隊人仔之餘，再話美匯太高，總之佢就係傳統低匯價政策嘅支持者。
美元匯價喺佢講完後即跌，我覺得唔係匯市大鱷畀面總統，炒家認錢不認人，就算你係聯儲局主席，佢哋炒起嘢上嚟都話之你。美元掉頭調整，短期原因與新總統上台美元亢奮期短暫結束有關，升得多要回吐； 中長線嚟講共和黨係大花筒，佢哋執政多數係弱美元主導，所以匯市一聽到特朗普咁講就反應先插一下。
去年底，美元強、人仔弱，港股真係無運行，人仔前晚扯高，港股一開就升，突破咗23000點大關，早市曾高見23151點，升幅達311點，午後大市略為整固，於23000點附近橫行，收報23098點，升257點；國企指數收報9802點，漲100點，成交金額685億元。
藍籌股造好，連續兩次進行回購的長實地產(1113) 升3.35%，報52.4元。股價已連升6日的渣打(2888) ，獲大摩唱好，股價一度高見72.05元，收報71.7元，升0.49%。一月份個市本來想炒定派業績，而家借住美元弱番啲，人民幣穩番小小，喺成交少少下再夾上啲都唔奇。
油服股再炒上
呢排持續醒神嘅板塊係石油同油服股，若講幅度當然係油服股勁好多，巨濤海洋(3303) 單日爆升咗16%，報1.29元；百勤油服(2178) 大漲7.7%，報0.56元；安東油服(3337) 升2.7%。
內地《財新網》報道，中遠海運集團將參與收購東方海外國際旗下的航運公司東方海外(316) ，參與競投東方海外的還有長榮海運及法國達飛輪船。報道引述消息指，中遠海運中標可能性較大。
中遠海運發言人稱並不知情，東方海外發言人亦澄清，有關報道是謠言，公司未有考慮過賣盤。東方海外股價急升，一度飆11.85%，高見43.9元，收報42.1元，升7.3%。內地航運公司正醞釀股份改造，加上國際航運公司都有不少併購，令到東方海外成為股改炒作股。由於主角唔認，股價有誤中副車味道，估計跟住又會滑落，短期唔似會成事。但唔排除遲啲回番後，搵機會又炒過。呢啲好似銀行賣盤的消息，長炒長有。而且東方海外而家唔賣啫，遲啲人哋出高啲價，或者又考慮呢。
陸羽仁
金融High Tea 舊文
來源 source: http://hdfin.stheadline.com
