財經評論 2017年1月20日
財經評論：
新盤熱賣背後啟示
■臨近歲晚，一眾地產商沒有收爐意欲，齊齊踩油出貨賣樓。 資料圖片
臨近歲晚，樓市旺場，香港的一眾地產商一反傳統，完全沒有收爐意欲，齊齊踩油出貨賣樓。不論是新地（016）元朗樓Grand Yoho2期，抑或是中海外（688）的港人港地啟德1號2期，近期賣樓都清貨完場。
就算係今日先賣樓的新世界（017）荃灣西站上蓋項目柏傲灣，首批400個單位，市場估計都唔會差得去邊，去貨唔成問題。業界預期今個月有可能是十三年以來最旺的新春前夕，發展商們又狠狠摑了政府一大巴。
政府上年11月出新辣招，結果唔夠兩個月，一手樓又已經旺番，市場靜了一陣子就已經回復「癲」貌。中原集團主席施永青早前講到，新辣招出台已見措施無效，「破壞有餘，建設不足」，認為新辣招只是令交投急跌，但樓價則無大跌，此說法已經沒有爭議。最重要的是，買樓的買家大有可能只是人頭，找數供款都未必是簽買賣合約個位。
上星期六以一句「買樓最緊要識投胎」而成為城中熱話的啟德1號2期買家陳生，表面上是一名廿四孝爸爸，豪花1,000萬元買了一間兩房單位供一對子女居住，雖然講明要他們自己供款，但就為他們付500萬元首期，陳公子同陳千金，根本已經贏在投胎前。
此案例同時反映出，陳生好明顯就係找數埋單，但唔係住個位，現時仲要一街都如此的例子，行入售樓處，隨便找來一大班想幫仔女買樓的慈父慈母，發展商只要稍為抓緊呢批購買力，過年前想唔豬籠入水都幾難。
再者，呢批人的財力夠，工作收入都相對穩定，同銀行講數借按揭都相對易少少，銀行界相信都唔介意收多幾個呢類客，多多都夠膽借，只是怕佢地太有實力，借得少。不過，當大家看到，原來在香港買樓，原來已經唔可能靠自己一代去負擔，爸爸買樓畀細路好像變得天公地道，可想而知幾咁荒謬！
記者：黃嘉銘
財經評論 舊文
來源 source: http://hk.apple.nextmedia.com
