智取大市：
留一半力追落後
■棚要疏、手機相關、落後得嚟次次科網潮都有份炒，手遊股博雅應該冇走雞。 資料圖片
近日無論氣氛同市場信心都大幅提升，升市往往去到信心爆棚嘅時候，就會物極必反。H指近日升到超買水平，中線揸指數股，可先行減持獲利，但難得指數見轉弱，成交卻跌唔落，炒風去到次線股
、龍尾股，選擇以較低注碼掃嚇呢啲落後股，好讓自己觀望形勢同時，起碼唔會錯過豬都識飛嘅市況，所以，唔需要大幅減低參與程度，減低持倉，有盈利墊底，繼續搵嘢炒就得。
汽車股吉利（175）、手機科網板塊舜宇（2382）既然係升市龍頭，搵落後股最落鑊似乎都係呢兩個板塊。近期有一種現象，就係次線股裏面，棚越疏，越炒得高，如昂納科技（877），bid同ask兩邊一直都疏疏哋，股價由3.5元炒到5元，升幅其實同舜宇唔差得遠，去到近幾日，成交先開始大。昂納科技受惠5G得嚟，又有無人駕駛概念，本身絕非龍尾股質地，只不過間中會無厘頭大弱勢。同類落後股有京信通信（2342），預計一樣受惠5G浪潮，雖然快速爆上潛力唔高，但肯揸實應該遲早派彩。
順應潮流，棚要疏、手機相關、落後得嚟次次科網潮都有份炒，手遊股博雅（434）應該冇走雞，股價喺B band中軸有支持，成交開始回升，今次要輪到佢咯。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
