中環在線 - 李華華 2017年2月15日
中環在線：
帽後情人節曬玫瑰莊園
■顏寶鈴（左）幾年前同老公甜蜜慶祝結婚紀念日。
當大家噚日情人節見到office有女同事收到10支，甚至係99支玫瑰，對於「帽後」飛達帽業（1100）副主席顏寶鈴（顏太）嚟講都係濕濕碎，皆因老公（主席顏禧強）買咗成個莊園送咗畀佢，玫瑰要幾多有幾多，認真夠曬霸氣。
噚日顏太同傳媒講，其實個玫瑰莊園係顏生早喺3、4年前，同妹夫夾埋送畀佢自己同細妹。佢話，因為老公係福建人，嫌花貴所以唔鍾意買花，但係女人點都係鍾意收花㗎啦，所以顏生就喺一個機緣巧合嘅機會下，喺美國加州買咗個百幾畝嘅玫瑰莊園，仲可以種埋葡萄㖭，不過問到幾多錢，佢就話唔講喇。
夫婦青梅竹馬打天下
老公送咁大禮，顏太當然好sweet sweet，不過佢就好滿足咁講：「女人要求冇乜嘅，只要老公忠心（呢個形容詞可圈可點），適當時候𠱁嚇就得」，其間佢仲不斷讚個莊園「好靚好靚，有黃色、紅色等等玫瑰」，真係羨慕死人。
查實，顏生顏太都結咗婚30幾年，兩位喺福建認識，而顏生就係顏太中學嘅補習老師，兩人青梅竹馬。雖然顏太落香港時間比顏生早，但仍無損二人感情，同老公喺香港團聚後就一齊拍住上打天下，幾年前就慶祝咗9,999日結婚紀念日喇。
不過顏太又唔係淨係掛住愛情滋潤嘅，講起今年新年，顏太就話有成百幾個員工去佢度拜年，仲專登請咗班唱南音嘅專業人士去佢屋企表演，連佢媽媽都唱埋一份㖭。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
