財金冒險號：
染唔染藍無所謂？
■吉利汽車獲納入恒生指數。 資料圖片
吉利汽車（175）意外「染藍」，獲納入恒生指數。有線財經當晚訪問吉利其中一位執行董事，其「得獎」感受竟然係「入唔入恒指無所謂」、「入咗未必係好事，會多咗啲因為指數嘅無謂交易」、「只要做好份內事、做好業績」。
小
生出席上市公司業績發佈會及飯局，間中都聽到類似言論，例如分析員問及近期股價低迷，有乜辦法振興股價，管理層就答「做好份業績，唔著重股價升跌」。無論係真心話（可能管理層無持股，花紅亦不與股價掛鈎）定耍太極（唔識刺激股價），都反映管理層無能短視。
上市公司管理層，份內事確係做好業務，業績長遠會反映於股價，但染藍百分百係好事，原因要追溯至點解要上市。上市最大嘅目的係獲得集資平台，適當時抽水以壯大業務，而對於消費品牌如吉利，上市可提高知名度，增加消費者信心。入咗恒指，成件事如魚得水。一來品牌更響亮，二來估值會提升，正正係由於「多咗啲無謂交易」，成交夠曬活躍。同樣係集資，用20倍市盈率發新股，總好過用15倍發。
同情地理解，吉利執董都無諗過會染藍，隨口拋低幾句回應，未必代表公司立場。口口聲聲話「唔注重股價」嘅管理層，可能自以為全心做好本業，其實暴露咗無視小股東死活、唔識善用資本市場嘅弊病。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
