中環在線 - 李華華 2017年2月16日

中環在線 - 李華華 2017年2月16日


中環在線：
小肥牛掛牌　鼎爺撐場
■鼎爺同國茂主席黃惠芳原來係好朋友。　李潤芳攝

火鍋店「小肥牛」上市啦！除咗有「鼎爺」李家鼎撐場之外，仲有一班餐廳老闆現身支持，真係烚嚇烚出好感情，有錢齊齊搵咁喎。

小肥牛母公司國茂（8428）

噚日掛牌，見到鼎爺出席，以為下次會由小肥牛贊助佢個烹飪節目，點知鼎爺笑笑口話要問公司，佢冇嘢好講，至於佢個人有冇買番幾手股份？鼎爺都係笑笑口冇答到。唯一肯講嘅就係同主席係好朋友，所以嚟撐場咁囉。

除咗請到鼎爺畀面出席，仲有十幾個餐廳老闆行家到場，個個都有頭有面㗎，例如翠華（1314）李遠康、太興陳家強、正鬥粥麵何冠明、金百加黃家和、富臨代表等。之前咁多隻飲食股上市，有呢個陣容的確好少見。

合照高呼「牛氣沖天」
不過都啱嘅，創業板新股之前炒到癲，好多隻一掛牌就由幾毫變幾蚊，甚或幾十蚊，上月監管機構出口術，要求新股配售時，股權分散啲，有3隻創業板新股隨即要押後上市，國茂搵多咗投資者，又分得散，得以成功上市，話唔定呢班老闆行家都有份投資。

所以呢，佢哋成班行家合照時，有人就提議做6字手勢，仲興奮大叫「牛氣沖天！」國茂上市價每股0.25元，如果升到6蚊，即係升23倍，真係賺到笑。不過隻股噚日好冷靜，收報0.295元啫。

李華華
mailto:LiWaWa@AppleDaily.com

（後排中）格仔西裝：國茂行政總裁郭耀松；（後排中）白衣戴襟花：郭耀松妻、國茂主席黃惠芳；（後排右六）餐飲聯業協會副主席、海港飲食集團市場顧問林查理；（前排右二）餐飲聯業協會副主席、太興第二代掌航人陳家強。 ■國茂行政總裁郭耀松（中）同主席黃惠芳（右）合照，鼎爺企埋一邊型格托腮。

李華華
LiWaWa@AppleDaily.com
中環在線 - 李華華 舊文

來源 source: http://hk.apple.nextmedia.com