財路：太平洋網絡有得諗
■太平洋網絡董事長林懷仁。 資料圖片
太平洋網絡（543）街貨市值唔夠10億元，又係淨現金企業，有殼嘅質地。而集團預測PE又比海外行家平大大截，單睇硬數據，亦有得諗。
太網主打汽車網、女性時尚門戶網同親子網，集團2007年上市到家陣，就快十個年頭，但現價1.97元
，比期內最高位6.78元（2014年3月）累跌70%過外，潛喺近五年海底位，總市值得22億元，扣除三位主要股東62%權益，街貨市值得8億元多少少！
仲過癮係，太網上年盈利雖然倒退，但仲keep住每股派近0.164（港元．下同）股息。呢板股息總額大概1.86億元，等於太網2015年尾總現金4.8億元近40%。又連派息後，太網到上年6月仲仍然揸住2.7億元淨現金。
雖則入門網投資額度相對唔大，但太網錢唔留喺身，用嚟發展，而係keep住派高息，一班掌舵嘅意興又係點？太網本身已經主打網站生意，唔使變嚟變去，呢個「牌面」亦好值租，但集團家陣市值咁細奀，仲要係淨現金企業，財政乾乾淨淨，講係咁講，太網俾投資者敲門，又幾奇？
排除呢個可能。場內專業預估，太網今、明兩年turnaround，EPS0.224元同0.27元，預測PE8.8倍同7.6倍，今年預估1.6倍PB。海外行家英國Auto Trader（英AUTO）市值39.5億，但係英磅，折約367億港元，係太網總市值16.7倍！Auto Trader今、明兩年預測26倍同23倍PE，明年預估PB500倍、澳州Carsales（澳CAR）兩年預測PE22.7倍同20倍，今年預估PB9.6倍，太網平咗大大截！
煲太網，買硬數據，當翻半番到近3蚊，明年預測PE先得11倍，未有耐追到上面兩位行家。又太網就算翻一番到4蚊，街貨市值廿億唔夠。一隻咁乾淨嘅公司，咁嘅價值，對投資者嚟講真係碎料。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com
