異動空間：炒作加息蜜月期
■不少人視恒指二萬四為鐵頂，難以突破。 資料圖片
加息、油價、港滙三重夾擊，港股再度向下調整，又要問一個問題：「真的走鬼了？」先講加息，下周加息機率百分百，理論上現況已反映加息0.25厘的影響，重點在於會後聲明點睇未來加息步伐，如維持原判，即未來9個月只加兩
次，平均4.5個月加一次，並不算急，換個角度睇，反為市場提供一至兩個月炒作蜜月期。
隔晚油價重挫半成，資源股散曬可以理解，走定留要睇業績逐隻秤，預期會幾靚仔、仍守20天線的股份不妨守多陣，例如洛鉬（3993），反彈時動力料會最強。至於港滙，其實年初以來兌美元一直轉弱，只係升得慢無人理，直至周三抽穿12月高位，傳媒才大肆報道。
市場預期香港下周唔會跟美國加息，兩地息差進一步拉闊，資金流走是情理之中。不過，魏力早前多番提到，今年是北水南下搶港股話語權的一年，細水長流之下，長遠應可部份抵銷外資流走的影響，故此暫毋須睇得太淡。
不少人視恒指二萬四為鐵頂，難以突破，但打開恒指三年圖，比較2014年7月至2015年3月的走勢，與近月確有不少相似之處，不是說之後會再現大時代，但有危自然有機，樂觀一點看市，無壞。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
