智取大市：睇錯市要識面對
■筆者認為，即使做到大漲小回，都應該繼續思考點樣做得更好。 資料圖片
原以為美股轉弱之下，港股連日先跌後升，多個板塊炒得起，係港股強勢徵兆，殊不知開口中，估完港股升，噚日就洗倉。自己未能駕馭呢一浪，絕不能歸咎運氣，睇錯惟有減持，然後檢討。
睇錯股、測錯市，點
完事後煙，最重要有三件事。第一，睇中市贏多啲，睇錯市輸少啲，長線拉勻要做到大漲小回。如未能做到，就要回顧自己嘅trade，表現好嘅時段贏得唔夠多？抑或表現差嘅時段輸得太多？從中調較自己操盤方法、注碼。即使做到大漲小回，都應該繼續思考點樣做得更好，因為市場會一路進步，自己停滯等於跑輸大市，好易畀市場吞噬。
第二，汲取教訓，避免重覆錯誤，往往係成長嘅機會。錯，可以睇成已過去嘅結果，更應該設法變成下一次成功嘅「因」。有時作出正確嘅檢討，係為咗令自己下一次能收復失地、甚至大幅倒贏。例如2014年下半年做得唔好，然後喺2015年上半年修正，一個港股大時代贏得多，足以彌補之前幾多過錯。
第三，耐性！耐性同埋耐性！檢討過後，眼前機會唔係話嚟就嚟，必須等待下次對自己較有利嘅市況出現時，以最強信心回歸，呢個機會可能係幾個月後，可能係一年後。
最後提一句，呢個世界，沒有永遠贏家，更沒有容許自己長期出錯嘅贏家。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
