中環在線：滙豐山旮旯分行
職員得兩個
■滙豐呢間分行雖一眼睇曬，但欣格雷（中）和黃碧娟（右）亦相當重視。
銀行成日俾人投訴唔去偏遠地區開分行，搞到金管局總裁陳德霖差唔多次次見傳媒都講一次要推動「普及金融」，噏咗成年有多，幾間大行終於交功課。好似滙豐，客就真係夠多嘞，但分行數目近年維
持100間左右，部份只服務Premier高端客，難得佢哋都肯積極響應陳總呼籲。
300呎劏房格局
滙豐噚日就喺山旮旯嘅沙田水泉澳邨，開設首間日夜理財中心（Day& Night Plus）。雖然地方細細得300呎，劏房格局，但營業時間有兩名服務主任當值，仲有幾部24小時運作ATM機，大部份分行服務都做到，只係望落少咗個櫃位。
滙豐有功課交，「一姐」大中華區行政總裁黃碧娟（Helen）當然有到場支持。Helen著到靚一靚，件外套襯番滙豐咁紅，又切燒豬，好似年初一咁高興。
但水泉澳邨居民入夥無耐，閒日其實幾靜局，當值兩位同事咪成日你眼望我眼？香港區零售銀行及財富管理業務主管欣格雷（Greg）就話，其實呢類小社區有唔少老人家，未必識用電子化服務，兩位同事嘅面對面服務變得好緊要㗎。
此外，滙豐第2架流動銀行車將於4月3日（星期一）啟用，今年年底前仲有第3架。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
