地產易做 傳媒難撈
2017年03月10日
美國聯邦儲備局下個星期議息，市場開始感受到不安情緒，開始消化利率上調嘅消息，黃金、油價下調之餘，港元同港股都弱勢。
港股周三反彈，昨日一下跌突，收市跌咗280點。昨日大市係中港一齊調整，理由係內地2月份CPI同比上漲0.8%，漲幅比上
月回落1.7個百分點，亦大幅低於預期的上升1.7%，創2015年1月以來最低增速令市場擔心內地有通縮威脅。
專家解釋，CPI弱過估計是因為去年春節是2月份，加上寒潮天氣，價格基數較高，有技術性因素的「翹尾效應」。消息公佈後內地股市走軟，上證等三大指數都回調。不過，港股跌幅比A股明顯，下午大陸股市跌幅有限，港股就下插到低位收市。
低撈博反彈要捱價
恒指跌得勁，反映大市本身有積弱因素，其中一個係美國好可能下周加息，所以見到人民幣同港元都有啲壓力。
滙豐大中華區行政總裁黃碧娟話，而家市場大多轉為預期美國本月加息，以致港元近日轉弱，由於本港流動資金充裕，若美國下周加息，香港會否跟隨，仍要視乎情況而定，惟市場已預計此因素。她又估人民幣仍有貶值空間，年底可能見7.2人仔兌1美元。
美國係加息揭盅前都受住一股低氣壓罩住個市，短期唔容易大升，反而去到低位可以考慮撈吓貨，等加息落實博反彈。如要博走短線係呢個時間買股，先要預咗捱價。
昨日恒指收報23501點，急挫280點；國企指數收報10095點，跌184點或1.79%；紅籌指數收報3860，下滑50點或1.3%，成交金額708.73億元。
中資同內銀股偏軟，建行(939) 跌2.10%，收報6.06元。加息不利商品價格，三桶油都腳軟，中海油(883) 跌1.8%，收報8.89元；中石油(941) 跌2.2%，收5.76元，中石化(386) 更急跌3.4%，收報5.89元。
有線賣盤無著落
昨日九倉(004) 公佈2016年全年業績，表現算係幾靚仔，唔怪佢之前股價已升定先。九倉全年盈利214.4億元，按年上升33.8%；每股盈利7.07元；派第二次中期息每股1.57元，期內核心盈利增25%，至138億元。九倉近年係內地大展拳腳，既起商場又起樓賣，早兩年大陸樓市放緩，佢都受到影響，但去年大陸一聲去庫存，九倉係內地賣樓又旺番，結果順利執番筆。
做地產同商場賺到笑，但佢搞媒體就唔係咁盞。之前九倉有意出售非核心嘅電訊業務，想將網絡同有線寬頻(1097) 打包出售，結果最後買家只係買咗個網，有線電視要另覓主人家。
有線之前派發去年成績表，期內，虧損擴大至3.13億元，手持現金減至約1億元。九倉披露最新狀況係所有洽購已經終止，該公司對有線不會額外嘅資金承擔，咁講豈不是要終止有線電視嘅媒體業務？對期待賣盤嘅有線小股東，暫時又要失望。
係呢個消息前，市場已流傳另一間媒體公司路訊通(888) 旗下RoadShow，係啟播近17年後將於6月底停播。
路訊通母公司一樣係大地產商新地，新地公佈嘅中期盈利肥到著唔到襪，不過都忍唔到RoadShow經營唔賺錢，可見在商言商，地產好做，傳媒難撈，咁辛苦為乜，都要諗諗點樣做落去。
陸羽仁
金融High Tea 舊文
來源 source: http://hdfin.stheadline.com
