異動空間：洛玻有得追落後
■投資者擔心唔走會再跌，又害怕一沽就反彈。 資料圖片
圖表靚仔、業績得體，做足功課放膽買落一隻股票，點知由買入一刻開始，隻股票就keep住跌。以上情景，炒開股一定感觸良多，「走定唔走好？」內心在掙紮，掌心在冒汗，既擔心唔走會再跌，又害怕一沽就反彈，送錢畀對家
使。信自己分析，最後揀唔走，而個價就繼續跌，「資源股隻隻都炒，點解係佢唔升？」
以上實例，就係魏力上月買洛陽玻璃（1108）的實況。當時6蚊買入，諗住食三個概念：通脹、母公司注資、AH大折讓。洛玻A在停牌等重組，諗住資金會南下掃H，結果個價就一路向南，早幾日殺到落5.4元，賬面輸1成。「究竟計漏咗乜？」原來是在等一份通告。關於今次資產重組，上交所向洛玻提出了一堆疑問，洛玻上周四回覆，並成功申請A股在周五復牌，即係重組有望獲批落實。已停牌半年的洛玻A，甫復牌就來個漲停，H股也順勢炒上，捱咗成個月價的魏力亦鬆一口氣。
翻查CCASS，北水（中國證券登記結算）持有洛玻H達20.56%股份，為最大持倉，過去半年收集價約為5.49元。洛玻H亦較A大折讓80%，為目前最大折讓AH股。過去半年AH溢價指數不斷收窄，洛玻H大有追落後空間。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com
