智取大市：
錯過買樓機會唔代表錯
■錯失之前低位上車機會，就要知道如何汲取教訓。
莫講話80後未能享受樓價低企上車嘅年代，即使係70後亦可能錯估形勢，近年仍掙紮於上唔上車嘅決定。其實不能怪任何用家高追、或堅持租樓係愚蠢，就連專家都可能食屎嘅年代，又點能夠要求一個小市民能夠估中樓市大形
勢、做啱決定？
03、04年固然係上車好時機，09年海嘯後亦係撈底良機，其實2010年底推出辣招過後，馬後炮睇返都係上車二次機會。遠喺2010年第一次推出辣招時，首推買樓後兩年內沽出要畀樓價至少5%辣稅，小弟當時都覺得死硬，中短線炒家全部失蹤，仲點會升？點知樓價好快破頂，12月初CCL89.41，月中跌到87.48，但去到11年1月初已破頂，升到90.05，之後毋須多講。
做錯決定，就要知道如何汲取教訓，小弟歸納了三件重要事情。第一，要知道壞消息上升破位嘅重要性，消息壞到極、樓價仍破頂，證明樓市強到不得了，要衝。第二，太低估曾蔭權班子，當年政府班底個個腦袋正正常常，出辣招隊冧樓市嘅政治後果都願意承擔，證明政府預知樓價升到hihi，結果的確如此。
2010年尾冇買樓，表面上睇決定當然是錯，第三件學懂嘅事，係做錯決定之後，如何更努力去收復失地，利用原本可以做首期嘅錢，發奮鑽研炒股或做生意乜都好，無論跑唔跑贏樓價，最終有盈利加上賺錢技能落袋，仲好過食住樓價升勢，呢種錯有錯著就唔係錯。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
