【實力取勝】私人飛機的飛後報告（陳承龍）（第118期）
2017-3-30 16:00:33
剛過去的周末，小弟又飛咗去日本，上次飛就因為策略王要員李鴻彥結婚，今次就為公事啦！主要係參觀日本當地嘅電子支付市場，事實上，日本作為一個購物天堂，如果有一簡單快捷嘅支付系統就不得了啦。
今次，我就去參觀由一間中國科技巨頭進軍日本消費市場的支付系統，堅方便簡單，一嘟就搞掂，知知哋我講乜啦掛？
由於公司方面仲未有正式公佈，所以我唔方便講得太多，只知，香港有一間上市公司有可能取得日本當地的經營權，至於邊間，我又唔講得，等公佈吧。不過，據了解，呢個支付系統的經營模式都相當龐大，其主要針對客戶對象，就是在日本旅遊的中國遊客，因為他們絕大部分都已用開呢一嘟就搞掂嘅支付系統，去到海外原來又有得嘟，仲唔博曬老命消費咩？
據我所知，暫時參與嘅單位有一間中國科技巨頭，一間日本銀行，同一間可能參與代理業務的香港上市公司，如果成事嘅話，呢間香港上市公司就不得了，起碼身價大升啦，一有早新消息即刻同大家回報，或者大家勤力啲睇通告。
講返今次日本之行，除咗參觀當地嘅支付市場外，最大得著莫過於有幸坐到私人飛機。點解今次有得坐，因為遇著賞花高峰期，正常機位全部爆滿，最後一班朋友就去訂一架可坐8位嘅私人飛機，雖然價錢比每人的頭等機位還要貴一點，但人一世物一世，如果大家有機會可以坐嘅話，我覺得可以一試，因為真係堅爽，唔使同人逼排隊過關同上機，到臨開機前先施施然去特別候機室安排過關同上機，淨係呢個優勢，就已經值回票價。一落機又可以即刻走人，因為唔使去行李輸送帶等行李嘛！
至於其他服務方面，老實講，同大機差唔多，不過，可能私人機人少，所以空中小姐相對唔太吃力，可以逐個招呼，又係幾好嘅，至於膳食方面，都係喺當地啲大酒店訂定啲食物，今次喺東京返嚟，就係食東京間香格里拉之嘛。不過，仲有一個優勢，就係喺飛機上有wifi使用，不過，依家好多航空公司都有提供，但都要額外支付，但租私人飛機通常都包埋。
總括而言，養一架私人飛機就唔好諗啦！據一位富豪朋友講，如果買一架8至10位嘅私人飛機售價約2000萬美元，面數都唔算太貴，約1.4億港紙，但之後嘅使費驚人，一個月起碼使500萬港元，所以送架飛機畀我都冇用，因為冇資格養，反而好似今次咁，搵啲專係承辦私人飛機嘅公司，間中租一次玩嚇就唔過份，我估計大家之後都可以試到，因為開始有普及嘅情況，希望下次你哋飛時可以預埋我。
實力取勝 - 陳承龍 舊文
來源 source: http://www.winmoney.hk
