美股長線投資者經驗良好，而市場掛牌指數基金的興起，提供分階段入市的方便，又不用煩惱選股，更加容易吸引資金流入，全球百川匯河，自然一市獨大。
如果閣下不想麻煩，月供標普500指數基金SPY，當作是供樓咁供，其實依然是一個良好的投資習慣，亦可省卻睇財經新聞的時間。雖然有短線波動風險，總好過升
幾百點貪心怕走寶，跌幾百點就擔心會股災，又或者坐一堆整體作戰能力不高的中港股票。
今日港股看來會高開，美元回順，可能比美股勁升幫助更大。有上周四的教訓，自己初段自然有理無理先走為敬，將短線高槓桿衍生工具減持，搶一鋪雞胡，有籌碼在手，之後的留放才可以較輕鬆。人同此心，除非恒指攻破24,100點，引發上升漩渦，否則雙頂的憂慮，始終會限制短期的表現。
板塊輪動 吼落後股
指數無景，主要是加息陰影籠罩地產股，加上市場長期表現培育出大批搶胡的喪屍。不過自己會保留兩大藍籌打雙箭頭，希望上周五指數基金換股盤完結之後表現會正常化，甚至因為要填補地產股的失落，令表現更強。
另外，市場炒復甦的風氣蔓延到燃氣股，亦會冷吼博回報。港股長期落後，但靠短期板塊輪動，仍有投機價值。
豐盛金融資產管理董事 黃國英（作者為註冊持牌人士）
Money18更多即時港股指數資訊
上一則
下一則
對沖國度 - 黃國英 舊文
