經濟客艙：
中資瘋搶地 買唔買樓好?
■香港樓價反地心吸力上升。 資料圖片
中資來港積極搶地，短短一年間喺香港買走十幅地皮，由深水埗到香港仔鴨脷洲都有中資插旗，香港人唔只同地產商打工，而係向中資大財團打工。
中原城市領先指數（CCL）再破頂，香港樓價反地心吸力上升。
究竟幾時先買樓，其實就係有錢就去買；有阿爸阿媽願意畀埋首期，更加要買。有時候人嘅出身都好似紅酒咁，都要睇嚇係咩年份。八、九十後嘅註定係冇乜「業主運」嘅一群，唔係師傅上身，而係大家都係人工增長最慢嘅時代，亦是買樓最負擔不起嘅時代。
家陣按揭息率低，我哋要捱高樓價。今時今日按揭供樓2.5厘，將軍澳新盤藍塘傲呎價破兩萬，樓價堅離地。廿幾年前，都未知藍塘傲現址填咗未，當年就捱高息，樓價相對冇咁離地。
回帶廿年前，按息講緊係十、廿厘息，即係一層400萬港銀嘅單位，淨利息支出一年80萬港銀，聽到個心都離一離。不過，市區盤最貴都唔過萬，聽講紅山半島當年吹價未見兩萬蚊。
如果話等美國加息，香港樓價回落先再入市，恐怕今次美國息魔未必令香港樓市大跌。首先，中資盲搶地，麵粉價貴過麵包價。其次，人仔貶值同走資潮又來港買樓避險，最慘係香港住屋供過於求又冇辦法解決，香港又未必跟住美息同步上，等樓價跌係又排等。
如果政府真心幫新一代上車，又唔想大學生排隊爭公屋，可以向英國嘅「幫你買」大學生版（Buy-for-Uni）偷師。英格蘭同威爾斯嘅大學生，可以透過貸款計劃，將香港慈父慈母補貼買樓嘅現象發揮到極致。
聽講計劃只要Year1或Year2嘅大學生，有父母或家人嘅物業作出抵押，就可以4.54厘至4.74厘息，借錢喺自己嘅大學附近地方買樓，貸款價值比率有八成，借款上限係30萬英鎊。即係有大學生想買個30萬英鎊嘅單位，借款24萬英鎊，其餘6萬英鎊就可以由屋企人抵押嘅物業補貼。
呢個計劃借錢嘅大學仲可以搵幾個朋友夾租，租金收入可以用作每月還款。不過，計劃當然有限制嘅，好似借錢購入單位唔可以多過四間房，學生搵朋友夾租都唔可以多過四個人。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
