女神tea time：
中國基建前景靚
■中國基建投資業績有改善。 資料圖片
識一個富二代，佢啱啱畢業幾年，有份正職但都係hea住做；最近同佢吹開水，問佢到底想做乜，佢諗兩諗話「我要做董事」，正當我心諗，都好呀都算係一份工作，佢竟然補多句「係獨立非執行董事」。其實咁多年
嚟喺香港，獨董呢個職位喺唔少人眼中都只係「受薪花瓶」，當一個恨唔使做齋出糧嘅「有為」青年以做獨董為目標，可想而之，市面上應該冇幾多間公司嘅獨董係真發揮到原來監察上市公司嘅功能。
大市回氣，焦點又喺股仔上，今日同大家介紹一隻全港最細市值嘅仙股——中國基建投資（600）。公司至去年上半年按年多賺三成至1,135萬元，半年盈利已經多過2015年嘅525萬元一倍有多。
業績有改善，前境亦非常樂觀，2012年南京江寧開發區綜合發展項目，完工之餘更已分批發售、出租，年回報12%，即每年3,600萬元利潤已獲保証。另外，河南洛陽市新安縣天然氣供應網絡，首期管道建設已完工，現正待取得經營許可證。至於去年9月，亦收購天津俊華物流51%股權，代價為6,000萬人民幣，主事物流及倉儲業務，即係話公司已踏入收成期，今年業績應該會再有進賬。
另外，公司最新大股東張曉君，於2012年中以每股0.45元接下4.27億股，佔權10%，𠵱家佢手上批貨都未返家鄉。而前大股東手上兩成幾股權押喺中央滙金，當時股價為毫幾子，所以押價相信亦高於現價，你係滙金都會想快啲甩身。至去年6月結NAV為每股0.204元，現價大折讓，股價近期異動，可以一博。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com
