中環在線：
唔做瑞銀 任總鋪路入行會？
■任志剛係林鄭月娥背後嘅金融靠山之一。 資料圖片
候任行政長官林鄭月娥背後一直有三大金融靠山，包括金管局前總裁任志剛、金發局主席史美倫同亞洲金融總裁陳智思，大家都好關注究竟下屆財金班子有咩猛人埋班。雖則話2009年已經退休嘅任總，大家都唔覺得
佢會肯做番full time、出山做新財爺，但就盛傳佢好有機會出任行政會議成員。咁啱得咁蹺，任總啱啱正式辭任國際投行瑞銀董事一職，唔通真係想還原清白身，鋪定路入新政府做公職？
棄444萬年薪
瑞銀5月4日舉行股東周年大會，通告寫話任總今次係因為「個人原因」，而放棄連任董事。睇翻資料，任總2011年起已經出任瑞銀非執行董事，仲擔任企業文化及責任委員會同風險委員會主席。根據瑞銀年報，任總過去兩年、每年年薪係57.5萬瑞士法郎（約444.27萬港元），董事中唔算收得貴，而舊年佢喺多個委員會中開會嘅出席率一律係100%。
任總今年已經69歲，公職生涯長達40年，退休以嚟先後接受多項任命，包括中國金融學會（由中國人民銀行負責管理嘅組織）執行副會長、香港中文大學全球經濟及金融研究所傑出研究員等。對於唔續任係咪鋪路加入行會，或者擔任其他公職，任總發言人就話唔會評論喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
