操盤手劄記：
雄安大灣賤男好男
■五月將會舉行一帶一路高峯論壇，有助遠大接新單。 資料圖片
朝鮮半島戰雲密佈，加上復活節假期臨近，港股原本牛皮偏軟，但尾市喺避險交易拆倉，期指挾淡帶動下掉頭抽升，收24313，升225點或0.93%。值得注意嘅係恒指波幅指數VHSI（恐慌指數）已由
上周低位12.3，五日大升兩成半至15.5，偏淡機會大。
四月頭平地一聲雷，燕趙之地雄安新區爆紅，多隻股份隨即雄安概念上身，炒咗成個星期先唞唞，由粵港澳大灣區概念股接力。現時雄安區、大灣區都未有實質規劃出台，大家只係「炒地圖」。單睇地盤，雄安區最受惠係地膽金隅（2009）；大灣區則係大地主深圳控股（604）、龍光地產（3380）。
四月，諗起《人間四月天》嘅梁思成。中央讓雄安分擔北京嘅非首都功能，其實呢個意念早喺1949年已由梁思成提出，可惜佢嘅建議無被採納。當時佢對時任北京市市長彭真講：「50年後，歷史將證明你是錯的，我是對的。」原來佢早已預視北京交通、霧霾汙染等城市問題。
梁思成係中國建築史學家、建築師；父親梁啟超，太太林徽音。梁思成因梁啟超、林徽音關係，認識徐志摩。徐志摩生命中有三個女人，包括父母安排下結婚嘅張幼儀、追而不得嘅林徽音，以及好友王賡嘅太太、後來被佢橫刀奪愛嘅陸小曼。
成龍對吳綺莉母女不負責任令你睇唔過眼嘅話，徐志摩更會令你眼火爆！喺張幼儀懷第二胎時，徐志摩瘋狂追求林徽音，佢竟然要求張幼儀離婚兼墮胎。撇除喺文學上嘅成就，徐志摩本質上就係一個賤男！
我揀股有五大原則，包括盈利、派息、資產淨值、現金流及管理層操守。若管理層上娛樂版多過上財經版，終日喺女人間周旋，咁間公司好極有限。講到管理層操守，遠大中國（2789）康老闆算唔錯，佢曾經喺新春獻辭話：「天下沒有拿了別人的錢發展自己而不回報投資者的道理。」佢又多番喺股價低殘時增持。五月將會舉行一帶一路高峯論壇，有助遠大接新單，可以諗諗。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com
