中環在線：
海航招兵買馬 關振宇加盟
■關振宇任職巴克萊香港分行多年。 香港車路士足球學校圖片
海航集團近月以272億巨資來港投地出曬名，又在股市密密買殼，但可能始終係內地企業，喺境外發圍都有人才需求，要搵支盲公竹，噚日海航就公佈，搵咗巴克萊前高層關振宇入去海航國際幫手。
海航國際
係海航集團在港設立嘅子公司，早前海航集團投資總裁王爽介紹過，海航國際主力做境外投資。而曾經任職巴克萊、高盛、德銀等外資大行嘅關振宇入去做投資總裁，就係負責管理投資項目同相關融資，相信海航係buy佢外資行嘅背景同人脈。
挖鳳凰衛視主播掌media
事實上，海航嘅神秘程度好高，唔少市場中人都好奇佢搞乜，但問來問去都攤曬手。今次關振宇入去，大家起碼有多個對口單位。而且，據知海航除喺資本市場挖人，仲喺鳳凰衛視挖咗個主播Lawrence Chang Luo-Wen，負責媒體同企業傳訊。
海航確係不停在港擴充，舊年10月就喺中環ifc2期寫字樓租多咗1.6萬方呎樓面，較上手租客加租32%，月租270萬元，家陣喺ifc2期共租用2.5萬方呎，非常豪氣，多多才俊都放得落。
又聽講，唔少內地公司來港想挖角都會cold call，各位老闆不妨小心留意你嘅好員工，枱頭電話有冇一直響喇！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
