財金冒險號：溢價48%配股的啟示
■光銀公佈配股，內銀水緊已是燃眉之急，諗住揸內銀收息宜三思。 資料圖片
光大銀行（6818）擬向光大集團及華僑城集團配售H股，集資近310億元人民幣，全用於補充核心一級資本。配股價5.3283港元，較前收市價有48%溢價。咁大溢價配股，係乜嘢玩法？
全因大陸唔畀內銀賤價配股，起碼要一倍市賬率。按上年底賬面值計，配股價剛好等於一倍市賬率。
純為賺錢嘅投資者，當然唔會癲到高溢價入股，所以唔可以公開配股或供股集資，唯有出此怪招。呢單嘢反映兩件事。第一，內銀資本充足率唔夠，即係缺水。光銀以外、信行（998）、民行（1988）、浙商銀行（2016）嘅核心一級資本充足率都咁上下低，都唔夠10%。五、六年前嘅內銀抽水潮，可能重臨。
光銀公佈配股後，股價只微跌，意味高溢價配股好過供股？某程度係，起碼唔使小股東進貢真金白銀，而且以一倍市賬率發新股，唔會影響每股賬面值。不過，盈利攤薄就無可避免。光銀配股數量佔擴大後股本之12.34%。內銀盈利能力江河日下，集資所得嘅新錢無可能保持到原本利潤率，咁就攤薄咗每股盈利，所以光銀股價跌多啲至合理。
第二個啟示，係出動國企救內銀。一擲200億人仔入股光銀7.96%嘅華僑城，係央企，核心業務係旅遊文化產業，入股內銀可算無厘頭。樂觀咁睇，係大陸堅決去槓桿，有望化解金融危機。悲觀咁睇，係內銀水緊已屬燃眉之急。
3月底業績期時，市場炒作國企股加派息，其他行業仲有可能，內銀水緊就唔使諗，唔減派息已偷笑。諗住揸內銀收息嘅朋友宜三思。
笑笑生
http://fb.com/sneeringman
笑笑生
財金冒險號 - 笑笑生 舊文
來源 source: http://hk.apple.nextmedia.com
