經濟客艙：有種地產經紀太老實
■香港有38,000個持牌經紀，想突圍兼開單，唔係咁容易。 資料圖片
「日日匿喺房度，都唔知有乜貢獻，搵份工做，又冇份做得長。」睇見阿媽隔住房門向阿細細佬嘈，佢唔煩，聽嗰個都厭。
「叫你學嚇你阿哥咁，考個地產經紀牌，考咗未呀?」阿細細
佬讀書唔叻，見佢返文員工又嫌悶，做速遞又嫌辛苦，終於都迫到呢位阿細細佬考個地產經紀牌，底薪係奀啲，唔足一萬蚊，總好過佢日日匿埋喺房做伸手黨。
三個月前，我同老闆介紹阿細細佬入行。我哋呢間唔係咩大行，全公司計計埋埋都係十個人，但每個月都俾阿頭捽數捽到暈。如果跟行規「八二定律」，八成大單由市場最大兩間行瓜分，阿細細佬唔跟住我呢個大佬，想喺38,000個持牌經紀突圍兼開單，唔駛講，大家都心中有數。
「呢幾日話乜乜97年買樓狂潮重現，個個都話加息、辣招冇有怕喎！香港樓市都由700幾萬人嘅市場，變咗13億人嘅市場啦！」阿細細佬以為做地產經紀mark到大客或者大陸客，落嚇嘴頭氹客仔開單就有錢落袋，少年真係太年輕了。
樓市狂潮？從來賺得最多嘅，只有地產發展商，佢哋係咁推高樓價。做經紀，記住係要搵到客、簽到單先有錢開飯。咪以為今朝老闆果句「跑唔到條數，唔好放假」講嚇咋，冇單開咪話冇得放假，真係屎都有得你食。阿頭叫你派傳單，係要壯大你嘅膽量，出嚟做嘢，就唔好咁薄皮。
之但係，即使你付出200%努力，可能2%回報都收唔到，更何況性格衰老實嘅細細佬。
有日我呢位大佬湊住阿細細佬去同位準買家睇盤，諗住叫阿細細佬學嘢，點知終於出事。「呢個盤，明明都冇人話買，做乜要我扮接個客電話，話有人爭住買？賣樓、做經紀，唔駛做到咁狗呀嘛？」
作為大佬嘅我，聽到阿細細佬咁嘅反應，唔知道佢匿喺間房太耐，抑或係份人真係太天真、太純品，「唔該你諗嘢，唔好打直諗好冇呀！當你做到你認為「狗」要做嘅野，供樓、供車、供你老豆老母生活，仲要幫埋自己個親細佬起居飲食嘅時候，先再問呢個問題啦！」阿細細佬再問，「係咪一定要咁樣？」最後，我只可以拋低一句，「唔只係做經紀係咁樣，係做人要係咁！」
Captain Cool
https://www.facebook.com/seeforcaptain/
本欄逢周一刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
Captain Cool
經濟客艙 - Captain Cool 舊文
來源 source: http://hk.apple.nextmedia.com
