金融High Tea 2017年5月23日
海航購物名單
2017年05月23日
恒指昨日再創近兩年新高，但升勢就幾側埋有邊，除咗股王騰訊0700)再爆升，個股就榮辱互見。惠理集團(806) 中途停牌，暫未悉原因，佢停牌前急升咗8.6%，報7.85元。內地傳媒報道，海航集團擬與惠理集團董事長磋商收購惠理集團股權一事。
惠理傳獲洽購股價彈
呢單交易而家傳緊海航對惠理集團的估值逾20億美元，並擬在初始交易完成後，增持惠理集團股份。惠理係A股大時代曾經大炒，主要股東趁機減持，之後股價就喺低位徘徊無乜點升。公司2016年全年業績跌近50%。海航早前入主德銀，成為單一最大股東，而家惠理納入佢有興趣嘅購物名單，可能同佢嘅金融板塊係香港嘅一環。
最近海航東征西討，市場對於佢背景甚有興趣。最近中華書局就出版了《海航的神秘密碼》系列叢書，合共有六冊，解構海航快速發展之謎。台灣中央研究院院士朱雲漢睇過本書，評語係總結咗海航集團的過去，同時指向中國企業開闢全球化新路徑的無限可能。
內企係全球併購，一舉一動都惹人留意。有人去過海航係ICC嘅酒會，見到塞滿晒唔同地區嘅投資銀行家，大家咁踴躍都係想搵商機。海航集團咁進取，佢哋由海南一間細公司起家，不斷發展，成為綜合巨企。香港人而家接觸最多係佢哋嘅航空業務，海航屬下嘅香港航空同廉航香港快運急速膨脹，初期大家唔知佢乜來頭，但近年就打到傳統巨人國泰倒瀉籮蟹，大家後來先發覺佢哋控股公司大有來頭，近年憑着資本市場加實體業績兩條腿走路，成為內資一路奇兵。
港股昨日雖然上升，傳咗好耐嘅國泰大裁員正式公佈，派咗600個大信封，比早一日傳言嘅220個多。近兩年外遊風熾熱，機場日日人頭湧湧，但中環茶友年幾前已多番叫人唔好買國泰，到今年佢已經無彈此調。講起今次點睇，佢坦言國泰兩年前已經有病態，所以佢叫人唔好買，近一年佢業績又預警、又見紅，人人都知佢領嘢，所以都唔使再講嘞。呢次佢裁員，茶友話，方案派成年人工兼延長福利，公司都算係咁，而家失業率只係3.2%，有料嘅員工要搵工唔難，只係唔知有無咁好福利啫。
科網股又爆沽空狙擊
茶友話，其實國泰早就應該郁手，只係公司有工會，佢哋唔想搞到局面太僵，有啲諱疾忌醫，但天要下雨、娘要嫁人，係阻唔到嘅，工會都做唔到啲乜。而家國泰節流，方向正確，加埋燃油對沖影響減退，對業績會有幫助，國泰(293) 股價就彈咗2.3%，報收11.58元。至於力度係咪足夠，就要睇過，皆因佢病情唔輕，又唔敢第一時間郁手，令競爭對手多咗時間壯大，所以場仗唔知係咪咁快可以打完。
呢排騰訊真係強到無朋友，股價昨日創新高276.8元，收報275.4元。恒指係佢帶動下收報25391，升216點；國企指數收報10374，漲106點，成交819億元。中保監支持險資投資重大工程，消息刺激內險股造好，其中平保(2318) 大漲4%報48.2元，為表現最佳藍籌股；中國太平(966) 亦升3.6%報20.4元；不過，科網股呢排成為空軍嘅下手對象。最新係科通芯城(400) 遭Blazing Research發表沽空報告，指其目標價只值0.53元，並指其上市以來，不但偽造收入和盈利。股份於下午2時49分起短暫停止股份買賣。停牌前報7.8元，跌22%，最低曾跌至7.3元。內地《證券時報》引述公司首席執行官康敬偉回應指，「終於收到第一份沽空報告」， 認為對方假裝研究機構設於國內，公司已經第一時間向深圳警方報案，同時堅定進行回購。
其他科網股普遍偏軟，慧聰網(2280) 跌8%報6.16元；美圖(1357) 跌7%報9元；博雅(434) 走低4.4%報3.74元；網龍(777) 跌3.7%報20.9元。
陸羽仁
金融High Tea 舊文
來源 source: http://hdfin.stheadline.com
