中環在線：
小小超罕有陪誠哥漫步汕頭
■李澤楷（左）與超人喺汕大水庫漫步，溫情滿瀉。 李嘉誠基金會提供圖片
常言道"A picture is worth a thousand words"，噚日李嘉誠基金會出新聞稿，話畀大家聽「超人」李嘉誠出席咗汕頭大學畢業禮，但重點似乎係超人同佢
細仔李澤楷行汕大嘅3幅溫馨照片，事關李澤楷以往甚少高調地陪爸爸出席公開活動，唔通超人想將汕大交畀細仔繼續發揚光大？
出席汕大活動
聽講，今次係李澤楷第3次出席汕大活動，對上一次已經好多年前嘅事。超人係汕大校董會名譽主席（主席係廣東省副省長藍佛安），李澤楷不在校董會內，以李嘉誠基金會董事身份出席活動，參加畢業禮同校董會會議。
根據新聞稿，超人親自向阿仔介紹汕大各建築、地標、歷史同發展計劃，又喺名為碧玉潭嘅汕大水庫「漫步」，溫情滿瀉，算係難得一見。日前，李澤楷仲跟埋超人去同汕頭市委書記陳良賢開會㖭。
超人明年90歲，大家近年成日問佢幾時退休，上星期又傳佢打算明年退休，轉做顧問，將長和系交畀大仔李澤鉅，可能傳咗咁多年，消息對系內公司股價冇乜影響，公司之後否認傳聞，大家又當冇事發生。不過大家心裏明白，超人總有退休嘅一天，除咗上市王國，佢嘅慈善教育事業都要有接班人，咁啱呢次超人帶埋細仔去汕大，多少令人有啲想法嘅。
李華華
mailto:LiWaWa@AppleDaily.com
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
