操盤手劄記：中遠超人鬥買港口
■港口係國家命脈，中遠海控及李嘉誠鬥買港口。 資料圖片
眨眼就回歸廿年！國家主席習近平來港出席慶典前，港股先洗太平地，呢兩日細價股洗倉洗到一地血，David Webb嘅黑名單成為血的印記，50隻股份中47隻爆缸，影響市場氣氛。
回歸廿年嚟，港股越嚟越
「紅」，紅色資本已主導藍籌！睇下恒指組合，1997年6月30日回歸前夕，33隻成份股中只得3隻中資股，合共佔指數比重約5%；時至今日，50隻成分股中有成27隻中資股，合共佔指數比重近57%！
習主席來港，點少得一帶一路。中港剛啱就簽署兩份CEPA協議，包括納入一帶一路貿易，以及推動人民幣計價股票、H股全流通。
另外，據新華社報道，發改委同國家海洋局已發佈一帶一路「建設海上合作設想」，提出建設三條藍色經濟通道：一、經印度洋連接非洲、地中海；二、經太平洋連接大洋洲；三、經北冰洋連接歐洲。
航運股已有動作，中遠海控（1919）前周公佈，阿仔中遠海運港口（1199）收購西班牙Noatum港口51%股權。呢一著正係中遠海控全球佈局嘅重要一著，係掌握歐洲地中海沿岸嘅戰略棋子。中遠海控A股（滬：601919）上月中話「籌劃重大事項」而停牌至今，唔通有後著？
早喺2014年前，當中遠海控仲未二合一，仍然係中國遠洋同中國海運時，已全球買港口，提升競爭力。合併後更喺前年夥拍中投海外、招商局國際收購土耳其Kumport碼頭65%股權；舊年又收購希臘Piraeus港口67%股權及鹿特丹Euromax碼頭35%股權等。講到買港口，李超人都唔輸蝕，單計喺英國就買咗3個港口，皆因港口係國家命脈，握住港口控制權，等如握住該國任督二脈！
喺國策扶持下，航運股長遠前景唔錯。A股入摩，222隻入圍股中，中遠海控A股上榜。該股H股現價3.49元，較A股停牌前折讓44%，可望追落後。走勢上，10天線升穿20天線，出現黃金交叉。
割柑人
本欄逢周四刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
割柑人
操盤手札記 - 割柑人 舊文
來源 source: http://hk.apple.nextmedia.com
