魚樂無窮：殘爆概念股起錨
■王恒於3月及5月增持百盛，其後股價均有好表現，今次有望再炒一轉。 互聯網圖片
百盛集團（3368）上月高見1.44元，主要因新世界百貨（825）私有化交易炒起，一輪整固後再起錨，原來第二大股東王恒又啟動掃貨模式。
SDI數據顯示，王恒最新以平均價1.2472
元掃貨，持股量增至13.01%，王恒不是別人，而是金鷹商貿（3308）大股東，同行掃起同行所謂何事？相信只有王恒本人最清楚。
不過，百盛超值卻是不爭的事實。
近年股價因網購興起向下走，現價僅及2007年高峯近18元不足一成，市賬率跌至僅0.7倍，比起金鷹的3.5倍PB平80%，無論從協同效應抑或併購概念出發，王恒掃貨都合情合理。
講短期效應，王恒曾於3月及5月出手增持百盛，其後股價均有好表現，如此推斷，今次亦有望再炒一轉。講基本因素，百盛亦有好轉跡象，首季錄得盈利110萬人仔，成功扭虧為盈；去年9月將北京朝陽區物業出售，錄得9億人仔特殊盈利，集團最新手頭物業、廠房及設備達40億人仔，釋放價值潛力無限大；再加少少想像力，百盛招股價9.8元，大股東持股逾五成，畀大量溢價私有化或賣盤，依然賺到笑！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
