財經評論：
劏場經紀笠客實錄
■劏舖沒落，不少專做劏舖嘅地產經紀被迫離職。 資料圖片
做地產經紀是一場賭博，有人千萬年薪，有人賺幾得個崩。像舖市俊（化名）入行時劏舖大行其道，曾經撈得風生水起，今日劏舖沒落，在「有數是皇者，無數即刻扯」的地產經紀世界，終於跳船重回本業。
酒後吐真言，炒後見人話。
驀然回首，他深知當日揞住良心去「笠客」，坦言：「個舖得幾十呎，人企咗入去，連貨都擺唔到，點會有人買呀！哼，唔知點解公司好似有魔力咁，總係引到一大班人捧場，最終竟然賣得曬！」語猶未盡，繼續講：「其實當時唔使點sell，嗰啲明知唔保證嘅保證回報，連講都唔使講，啲人會自自然然走埋來。」
劏場普遍提供兩年保證回報，大業主搵負責賣劏場的經紀招租。阿俊話：「招租？哼！搵過好多間大型連鎖店承租，已經講到話零租金，就連管理費都唔使佢交，佢都唔肯租，話啲舖太細。好啦，咁咪話幾個劏舖黏埋一齊租畀佢囉！嚇，佢又話拆柱推牆嘥gas。就算拆埋，係個場擺一段時間，又要嘥資源請人運貨，最終連本都蝕埋。」
明知劏場惡果，但劏場一個接一個，繼續埋沒良知，「你對客仁慈，最終自己悲哀！」繼續自我催眠將死場當金蛋賣。
然而劏場沒落，舖市成交狂縮，他無上數多月，齋咬老底幾千蚊，就算老闆唔炒，自己都捱唔住，惟有離開地產界。阿俊知衰，仲坦白：「今日唔係決意唔食回頭草，都唔會同你講咁多。」人在江湖，身不由己，阿俊話，唔做經紀不帶半點悲傷，至多重返故業賣食品，再唔係北上挖金賺人仔。
記者：陳家雄
財經評論 舊文
來源 source: http://hk.apple.nextmedia.com
