笑到最後：
北水狠掃跟咗先算
■民行係近期北水買得較多嘅其中一隻股票。 資料圖片
港股一星期最多挾1,076點，上周五美股收市後ADR再升234點，似乎大市仍有空間再升。6月19日本欄寫過「調整市預跌兩千點」，當日至今最多僅跌725點，預測一半都未到，好明顯睇錯，睇錯被市場懲罰在所難
免，惟有急急認錯追貨，再慢慢向市場重新學習。
技術指標、圖表其實只係過去股價嘅一啲規律，過去當然唔能夠解釋未來，但通常歷史會重覆，一部份人炒股票慣咗一個手勢。特別係港股一向塘水滾塘魚，來來去去都係同一班大戶同散戶，慣咗手勢，有一定嘅路捉。不過，圖表唔能夠解釋嘅係，如果有個傻佬，好有錢，係咁買貨，即使圖表上係超買爆標，供求關係都足以令技術指標成為一紙空談。近期開始對港股有影響嘅就係北水，要喺滬深港通通車後一段時間，先至感受到佢哋嘅影響力。
呢班「新來港資金」玩法單一，就係買爆，有別於以前大灑金錢，最新玩法係炒爆一隻去下隻，集中火力谷行個別股票，所以整體成交冇大升但個別股份升到爆。
上星期講過北水炒東方海外（316）揚咗，最近狂買滙控（005）都好揚。不其然令高明諗到大約一年前中資天價投地，陸續有中國現代漢語文寫手講，中國要爭香港定價權，爭糧油水電，地價，到股價，都要中國話曬事。一個中國經濟規模咁大，嚟香港爭乜都會係災難，惟獨是爭股價，一般人都會有機會參與搭順風車，以今年港股表現，合理懷疑有政治任務要推高港股估值，將信將疑跟咗先。
至於跟乜？局住睇個北水牌中國證券登記結算，佢買乜，跟咗先。反正今年除騰訊（700）外，其他股票升幅同業績關係有限，短線睇波動嘅技術指標都失效，不問蒼生問鬼神，7月至今，北水買得最狠就係滙控、工行（1398）、太保（2601）、平保（2318）同民行（1988）。5隻唔一定要買曬，但總要有啲喺袋，例如太保同民行，相對較細，挾起上嚟會較勁。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
