經濟客艙：
為生活而建嘅鐵皮屋
■如果用料靚同設計好，鐵皮屋都可以係理想之家。
住喺香港嘅劏房盤並唔差，係差在唔夠的骰又唔夠矜貴。美國有種納米屋，就係屋仔特別細，但又唔係賣得特別貴，入場門檻低至「一球」港紙有找。
香港發展商為咗包裝間格其細嘅單位，宣傳策略各出奇謀
，新盤嘅名越改越離地。最近睇到一篇關於美國喬治亞州一個有關鐵皮屋嘅報道，冇錯，只係一間面積500呎、鐵片做屋頂、松木搭建出嚟嘅鐵皮屋。
最深刻印象嘅並非內籠間格或者設計，而係負責呢個項目嘅建築師講嘅說話，「其實大家都要downsize，市場需要更多大家負擔得起嘅房屋，最重要憑良心設計房屋。」從來都冇人解釋點解我哋住嘅房屋，越起越細，又越賣越貴。如果同發展商講良心，請問值幾錢斤？呢位建築師話大家唔需要多餘空間，人同人嘅互動就更方便、更親密。不過咩都係假，最重要係用料靚同好設計，鐵皮屋都可以係理想之家。
香港劏房盤湧現，美國亦面對越起越細嘅屋仔。香港可以考慮外國做法，加入合理嘅限呎條例，設最低住屋面積呎數。樓市去向由供求主導，樓價未必因為單位多出一百幾十呎而失控飆升。
Captain Cool
https://www.fb.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
