智取大市：港股真係好到咁？
■港股目前只係集中炒藍籌股同強勢股，暫時未睇到見頂跡象。 資料圖片
市況好嘅程度，有幾個跡象睇得到，先前講咗第一個，就係一隻龍頭股有壞消息，唔會感染至其他同業股份，可見投資者非常惜售；今期講第二跡象，就係炒到𠵱家都仲係炒龍頭、強勢股，非強勢板塊食曬塵。
投
資者永遠係極盡貪心，絕對唔肯剩係炒爆強勢板塊嘅幾隻龍頭股就罷休，最後無論如何都會經過弱勢板塊「到此一遊」，未去到炒落後股嘅階段，就話你聽未升完。
第三個跡象，就係恒指短期圖表貌似直昇機，其實似係旗形多啲。7月初恒指單周直線急升過千點，然後有幾日恒指變咗慢升，大家以為升勢弱咗，其實只係進入整固階段，而整固都仲係升咁解。恒指9日RSI升到83.8，正常要調整，但睇旗形形態就只係開始突破兩日，如果咁都未肯停就真誇張，下一步就係出現RSI頂背馳。
資金目前只係集中炒藍籌股同強勢股，暫時未睇到見頂跡象。內房炒到咁瘋狂，恒大（3333）固然癲，但融創（1918）配股三日已經升穿配股前收市價，強勢程度歷來少見，所以唔好睇小呢輪港股升勢，最重要係持有強勢股爆升到七七八八，就要可以先食糊再去另一個板塊，暫時進攻以大藍籌＋強勢股為主。內房之後可望嚇汽車股。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
