財金冒險號：以轉會費喻樓價
■盛傳尼馬由巴塞轉會PSG，轉會費2.2億鎊，與樓價一樣，已高到危險地步。 資料圖片
樓價高，唔止係香港問題，仲係全球大都市嘅問題。佛利民話齋：通脹何時何地都係貨幣現象。其實樓價一樣，都係2008年金融海嘯後全球濫印銀紙嘅現象。QE亦波及足球轉會市場，
只要你睇睇十年來轉會費走勢，就會對樓價飆升釋然。
2009年C朗拿度由曼聯去皇馬，轉會費係破紀錄嘅8,000萬英鎊。8年後嘅今日，愛華頓盧卡古之流都要7,500萬英鎊，𠵱家盛傳尼馬由巴塞轉會PSG，更加要2.2億鎊。放諸樓市，等於2009年買半山豪宅嘅錢，今日只夠買美孚新村，𠵱家想買半山豪宅就要畀貴兩倍。
曼聯領隊摩連奴最近都話：轉會費高到危險地步：「普巴、尼馬之類頂級球星，超高身價冇問題，因為一年只得一兩宗。問題在於其餘嗰百幾宗……大球會大把錢，喪買球星都唔怕……至於一般球會，一係唔甘心咁貴買啲普通球員，一係就要高價同人搶。𠵱家閒閒哋一宗交易都要三、五千萬，令人擔心。」
摩佬呢段說話，完全可以套用喺香港樓市：山頂、幹德道、壽臣山之類真正豪宅，幾貴都冇問題，因為稀有，而買家係真正富豪，唔怕樓價跌。問題在於一般市民，一係驚摸頂，唯有繼續租樓，一係夾硬高價衝入市。𠵱家新界上車盤都閒閒地600、700萬，偽豪宅分分鐘過千萬，確係令人擔心。
笑笑生
http://fb.com/sneeringman
本欄逢周五刊出
笑笑生
財金冒險號 - 笑笑生 舊文
來源 source: http://hk.apple.nextmedia.com
