中環在線：
李思廉廿分鐘傾掂199億大刁
內房股富力（2777）老闆李思廉（圖）今年都算威，早前向前內地首富王健林，以199億人仔買入萬達77間酒店，幫對方解圍。噚日李思廉爆料，佢哋講咗廿分鐘就傾掂數。
呢單刁幾耐人尋味，原先係另一隻內房股融創（1918）向萬達買酒店，去到上月公佈
交易當日，忽然多咗富力，由「二人行」變「三角關係」，仲傳出簽約當日有人怒掟酒杯！
堅稱冇發生掟杯事件
李思廉呢位「第三者」噚日現身，佢知道大家關心單刁，早有準備。佢話有份參與交易，係「咁啱（佢同另外兩間公司老闆）喺北京某場合巧遇」，傾咗十幾廿分鐘就決定呢單199億大刁，當中冇發生掟杯事件。
李思廉強調，同萬達王健林、融創主席孫宏斌係多年好友，當時大家喺VIP房，可能係「外面有杯子掉了」先會誤傳。
好嘞，掟杯解釋到，咁點解簽約當日，明明安排4點半直播，後來俾人踢爆印有富力嘅佈景板，拆完又裝番，乜事先？對此，李思廉解釋得更好，佢話喎，如果4點半開始會「太早食飯」，於是咪遲一粒鐘開始囉。哦，明曬。
60歲嘅李思廉雖然做內房老闆幾十年，查實係地道香港人，1978年取得中大數學理學士學位。聽完佢今次解畫，咁有黃子華幽默感，冇理由唔係香港人囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
