收市閒情：半桶水科技添麻煩
■政府2016年年報顯示，香港只有約47.7%駕駛者經過收費亭時會用Autotoll。 資料圖片
話科技共你經歷創傳奇，相信冇人反對，不過喺咩情況下，科技嘅應用係會帶來麻煩，就係「半桶水」應用。
早幾日青嶼幹線大嶼山及馬灣收費廣場，一推雙向收費，就搞到屯
門大冧檔。運輸署Say sorry，Ok，但原因竟然話係因為唔夠收費亭去收錢！如果當日有遊客問點解會塞死，有冇香港嘅代表可以講一句「沒甚麼，只是國際城市香港不夠收費亭」而唔面紅呢？喂喂喂，𠵱家2017年，「你睇嚇大陸電子支付幾發達乜乜物物」呢句都講到口臭，但搞咩香港人仲係用現金過隧道。
香港電子道路收費設施，係由港通（032）持一半股權嘅快易通獨攬大權。睇番港通年報，2016年全年，用戶總數約31.76萬名，按年只係多1萬人多啲，持牌車輛滲透率平均約40%。睇埋每日處理量，約40.3萬架次，涉及金額約港幣980萬元。另外，根據政府2016年年報顯示，當中只有約47.7%的駕駛者經過收費亭時會用Autotoll。以此推算，即係每日全港隧道收費員，係處理近千萬元現金！
由搵散紙，到伸手出車廂，再去交錢，等幾秒找贖，天呀！香港到底落後到一個咩點？「喂唔係呀！最新香港隧道可以用八達通畀錢啦！」親愛的，八達通是廿年前技術；「仲有呀，Autotoll轉咗用RFID貼紙啦，一張貼紙就收到錢啦」親愛的，RFID咪就係八達通個技術。其他國家，根本連收費站都唔需要！
有人話，市場問題，市場解決，電子支付興唔興，係市場決定。Fine，不過當你試嚇叫搵食車司機用Autotoll？佢哋會話，「你月月畀行政費，仲要玩增值，架車又唔係我嘅，條數要計係咪煩先。」再來，你叫的士界推電子支付，佢哋又會話「你電子收費，我咪要交稅？最慘係咩呀，我老婆咪知我一日搵幾錢，咪搞我。」
呢個到底係市場問題，定係鬥邊個夠大聲？
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
