中環在線：
舊中銀馬賽克天花重見天日
舊中銀大廈復修工程維時數月終於完成，成為中銀香港（2388）私人銀行總部。著名建築師貝聿銘兒子貝禮中（圖）噚日帶傳媒參觀，往時遭到覆蓋嘅Mosaic（馬賽克）設計天花，復修後終重見天日。
1951年舊中銀大廈落成，中庭舊天花以9個大方形砌成，並
以淡金色格子作為底色，再以白色、啡色、藍色格子配襯，砌成布幣、方孔圓錢圖案，錢幣上並有古字，大概為金、銀、財、通等意思，外邊以祥雲包圍。
不過，1998年新華銀行分行搬入舊中銀大廈時，裝咗個假天花遮住咗，貝禮中話復修最大挑戰係重現天花原貌，避免損漽，仲要好細心復修每一粒破爛嘅格仔，其間搭曬棚架，工程都幾大。另外中庭嘅圓柱變番方柱，同時引入咗啲奶白色嘅意大利雲石嚟修補，帶嚟和暖嘅氣氛。
貝聿銘當年以竹為藍圖
貝禮中亦有同大家分享父親當年興建新中銀大廈點滴，例如當初同父親以「竹」為概念，取其高䠷、堅韌特質，作為興建新中銀大廈嘅藍圖，融合工程及建築美學，十號風球都唔怕喎。
中銀香港在港即將迎來成立100周年，同時係貝聿銘100歲生日，貝禮中話佢父親已經冇再工作（Put down his pencil），不過對於兒子接手嘅項目，都會畀嚇意見咁，今年9月24日成立慶典，唔知佢會唔會出席呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
