金融High Tea 2017年8月25日
中資股食髓知味
2017年08月25日
港股因為天鴿錯過左一日升市機會，昨日重開有福依然在，雖然大市高開後已見全日頂位，但整體都叫做頂住高收。
恒指再向上衝，比較搶眼有兩個板塊，一個係手機設備股；另一個係中資金融股，當中幾隻龍頭內銀股都造出一年高位，對小股民嚟講，佢地嘅升勢可以話唔亮麗但實際。
人仔穩有利吸資
中資金融股喺第三季尾有接力而上嘅跡象，一來係因為今年上半年，大陸經濟比想像中好，令到銀行業整體無乜壞消息，內銀股本身已經係價低息率高，大件夾抵食，無壞消息已經係好消息。
另一個原因，係投資者今年買中資股，基本上都賺到錢，令佢地食髓知味。好似之前全球最大主權基金之一挪威最近宣佈業績，中港投資就成為佢地表現最好嘅組合成員之一。之前國際投資者唔敢買中資股，好大原因係怕人民幣大幅貶值，結果今年人仔意外地不跌反升，令到中資股回報優於預期。路透調查顯示，投資者預期美元喺未來數月將繼續走軟，進一步押注亞洲貨幣兌美元將會上漲，當中一大核心就係人仔。
美元年中開始明顯轉軟，美元指數今年以來已下跌約8.9%，國際資金多左持有亞洲貨幣。根據調查，人民幣今年以來已上漲約4.1%，而且好倉維持喺三年高位。另外投資者都揸多左印度盧比，主要係當地增長將改善，預期會吸引外資流入印度股市，令盧比兌美元今年以來已上漲約5.7%，可見市場對亞洲新興市場貨幣回復信心。
北京過去對人仔全力維穩，明顯已經收到保持市場對匯價信心，雖然人仔未來會加大區間波幅，有可能令到人仔匯價軟番啲，但由於美元上升勢頭改變左，加上美國外交政策多變，貨幣對中資股不利影響已大為減輕，令佢地低估值吸引力顯現。
睇番中資金融股，都係優質股表現最亮麗，內險股平保(2318) 創過64.9元新高，收報62.8元，倒跌0.4元，回調主要係消化累積升幅。被視為最優質嘅內銀股招行(3968) 收報28元，大升1.5元，升5.7%。
幾間龍頭國有銀行都各有進帳，當中工行(1398) 上揚1.8%，收報5.78元，升0.14元；建行(939) 收6.78元，升0.12元。
丘鈦一年升左6倍
中資股力撐下，大市雖然升幅收窄，都保得住有進帳收市，恒指收報27518，升左116點；國企指數收報11051，上漲96點，跑贏左大市，成交增至1048億元。
內銀股升幅慢慢地，無爆升到嘩嘩聲嘅手機設備股咁搶眼球。手機股新寵丘鈦(1478) 單日爆升22%，創18.04元歷史新高，佢一年內由3元爆升上嚟，累積升幅達到6倍，市值逼近200億元，市盈率去到53倍。
由於佢係高增長股，市盈率意義未必好大，同其他手機股比佢仲算係「細細粒」，所以炒起嚟特別好味。同一板塊嘅舜宇光學(2382) 升8%，收報116元，市值就進帳近百億元。不過手機股累積升幅大，基本上散戶都唔係咁敢玩，尤其是依家佢地上落咁大，先前無賺開錢嘅都唔會撲落去，反而悶悶地嘅內銀股呢舖仲容易賺到錢。
陸羽仁
金融High Tea 舊文
來源 source: http://hdfin.stheadline.com
