陸羽仁周記 - 陸羽仁 2017年8月28日
小股東樂見分產官司
2017年08月28日
豪門大族分家產打官司，近年幾乎已經係例行公事。早幾年轟動一時嘅新地(016) 郭氏家族爭產案，最近又有異動，前主席郭炳湘對於家族私產分配有意見，於是去法庭討回公道，案件令到郭氏家族私產曝光，總數原來有成400億元以上。
分產律師好做過醫生
新地郭家早前老大不滿被擺開，展開連串狙擊，掀起滿城風雨，後來在郭老太主持大局下，終於大和解，當中家族嘅私產就由三兄弟分配，結果老大郭炳湘就主要攞咗美國嘅房產，兩個細佬郭炳光同郭炳聯就要咗加拿大同香港嘅物業，o依家郭老大不滿分配結果，要係法庭再研究點分配，結果如何仲未知，但最開心係班律師。今次單官司涉及嘅財產有400億樓上，就算係半個百分點嘅錢，都已經有2、3億元。若然呢個只係前菜，最後連上市公司股權都要打官司，咁條數仲和味。早排文憑試尖子個個話要做醫生，佢哋除咗想幫人，可能都想會諗吓自己嘅「錢途」，如果真係從搵銀考慮，咁做專幫人打分產官司嘅大狀可能仲發。
郭家私產有400億元，家族擁有上市公司股權仲勁，起碼超過1000億元，如果講到控制嘅資產，市值有3600億元，計資產隨時有5000億元，都算係天文數字。有中環茶友話，新地市值驚人，照計可以搞重組分成不同公司，咁三房人分領自己嘅王國咪仲好？呢個講法只係想當然，皆因新地嘅招牌由伯爺傳落嚟，邊個敢搞散佢？而且天下咁大，皇帝只得一個，邊個願意係自己睡榻之旁，容其他人酣睡？
新地鷹君股價升
富豪家族分產，本來係家事，但都關小股東事，因為如果分家搞重組，固然有利反映資產價值，就算唔係起碼唔會一言堂，咁對小股東唔係壞事，從新地股價係消息曝光後升上一年新高，足見市場無視之為負面消息。另一個例子係鷹君(041) ，自從爆出咗羅老太話要換家族基金信託人，呢系公司都多咗動作，先係冠君信託(2778) 話研究賣產派息，上個星期鷹君公佈中期業績，除稅後核心溢利9.04億元，同比增長14.8%，每股盈利1.32元，中期息30仙，另派特別中期息每股50仙。
公司係中期已經急急派特別息，唔排除家族成員想攞多啲彈藥，用嚟增加持股量或預備一旦有收購戰之用，公佈之後鷹君股價翌日就彈高咗1元，董事局呢個決定，明顯受市場歡迎，亦有利公司形象。o依家好多地產公司都係高資產、低負債，無奈大股東唔想做嘢，所以從小股東角度，有時最怕係大股東食安樂茶飯，咁就好容易變咗不思進取囉！
鷹君中期派特別息，呢輪公司宣佈業績，有好多都表現唔錯，除咗房地產股，金融類都有好表現，仲帶動港股挑戰高位，上周恒指收報27848點，以全周計，恒指累積上升800點，國指創兩年新高，收報11288，累積上漲594點，大市最後兩個交易日成交都逾1152億元。
美股周五就略為向好，杜指收市報21813點，升30點，納斯達克指數收市報6265點，跌5點，標普500指數收市報2443點，升4點，港股美國預託證券亦向好。北韓係假期間發射短程導彈，但暫時似乎平壤同白宮都無意搞大件事。
大小公司興派特息
上周五東亞銀行(023) 宣佈上半年純利按年大增1.97倍至62.2億元，每股盈利2.2元，建議派中期息每股0.68元，比上年度同期派息每股0.28元，大增1.43倍。期內中國區業務錄得淨溢利3.36億元，扭轉去年全年虧損4.62億元。去年內地經濟下行，東亞內地業務大受壓力，同樣情況都係大新銀行(2356) 持有嘅內銀身上出現。今年內地經濟表現比預期佳，銀行交出成績都受惠，所以本地銀行同內銀呢排股價都相當醒神。
大公司手鬆，二三線公司呢排都興派特息，工業股龍記(255) 公佈中期盈利增至1.51億元，按年升1倍；每股基本盈利23.96仙，派中期息12港仙及特別息8港仙，大有大派，細有細派，對個市絕對係好事。
四季坐看風浪 大款印象難忘
上個星期天鴿嚟完又到帕卡踩場，好彩女特首林鄭係好命，大風無搞出人命。有中環茶友當日約咗人係四季酒店見面，未入去係門前已見到迴旋處吹到樹葉亂舞，係嗰度坐看風浪起，都感受到呢個風嘅威力。
包長房終於有回報
茶友當日係佢高層嘅行政人員餐廊食嘢，佢話睇住白頭浪湧起，好多內地嚟嘅大款住客，可能長期住係內陸，根本無見過打風，一邊睇一邊食嘢，真係留下難忘印象。有人仲笑言，餐廳有露台可以行出去，如果覺得室多感受唔夠直接，仲可以感受吓風雲變色嘅滋味。
茶友話，佢識得有個專做內地老闆生意嘅公關猛人，自己本身係南區都有豪宅，但就專誠喺四季包個長房，方便跟進班客，好似呢啲打風嘅日子，好多老闆同高管都被迫滯留係酒店，呢個時候就係傾嘢嘅好時機，畀咗咁貴租，呢個時間就係撈返回報嘅機會嘞。
陸羽仁
陸羽仁周記 - 陸羽仁 舊文
來源 source: http://hdfin.stheadline.com
