智取大市：升勢轉急有原因
■青島港估值低，股價有機會乘業績破阻力而上。 資料圖片
港股上周五升市成交增加到1,153億，連內銀股、石油股等重磅股都爆邊。升勢轉急，係因為回帶返8月10日同11日跌市成交大到一日千幾億，證明當時被震落車嘅資金為數不少，近日市況逐步回升，呢批投資者猛然發覺
要追返貨，於是帶動市況更大規模反彈。
若然港股能夠保持一貫慢升格局，仲可以喺業績股之中尋寶，同時揸實博內房、汽車代理、手機設備股輪流炒上去。如果市況升勢一路加快，就喺下一次亢奮然後轉弱時沽貨食糊，皆因升得快，必然見頂得快，然後跌得快。
內銀爆升，唔代表內銀股突然出現盈利前景改善嘅因素，只係股市上升之後，市場對於環球經濟信心提升，內銀股壞賬問題、以至表外資產質素自然有更樂觀睇法，在跟隨股市一齊重估，追落後味濃，呢類財務報表水份極多嘅板塊，中長期跑贏大市嘅條件有限。
業績股之中，青島港（6198）半年純利增長29%，以前收市價計，全年市盈率隨時回落到6至7倍。航運板塊之中，港口股較落後，但業績波動性較低，加上低估值有利青島港突圍，股價過去年幾形成上升三角形，股價有機會乘業績破阻力而上。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
