空軍 大戶 鱷魚蝨乸
2017年08月04日
內房愛搞刁，搞得刁多錢從何來就係問題。對空軍嚟講，有企業搞大型併購，就有覓食機會，好似早排融創中國(1918) 鯨吞樂視、萬達資產後，喺股、債市場連環「抽水」，咁環境自然吸引空軍注意，睇吓有無襲擊佢搵食嘅機會。
輪到融創被盯上
外電引述沽空機構FG Alpha，質疑融創嘅債務股本比率高達3.49倍，較內房平均水平高近五倍，同一時間融創股價升逾兩倍。因此呢條沽空空軍嘅首席投資官Dan David就明言，融創已經成為佢地潛在嘅「大目標」。融創主席孫宏斌有併購狂人外號，做嘢去到好盡，為咗吞下獵物，外界估計孫宏斌可能已抵押佢所持有嘅融創股票。
FG Alpha雖然盯上融創，但佢仲未郁手，點解見到有嘢食都唔開餐，陸羽仁估計佢仲摸緊底，孫宏斌食呢兩餐大茶飯，手頭銀彈唔係咁夠路人皆見，只係佢咁都做得成，當然有佢背後嘅部署，好似佢收購萬達資產，最初賣家話明想借錢畀佢，後來安排惹起關注，先至改為引進富力買入酒店項目，減低涉及嘅資產，咁就證明呢個刁背後有好多安排，唔係表面睇就可以拆解得到，貿然郁手可能會畀人玩番轉頭。
空軍想搵大目標，但對手如果有番咁大隻，就要小心吃不了兜着走。其中一個例子係恒大(3333) ，恒大過去二十年以高槓桿全速發展，一直畀人質疑佢負債高，今年佢安排回歸A股，股價向上，同時惹來咗空軍興趣。從港交所數據顯示，今年沽空佢嘅人唔少，期望喺佢股價見頂後搵食，但恒大愈升愈有，一年間升咗幾倍。呢個星期有就嚟賣盤嘅周刊報道走去翻吓恒大嘅樓盤發展狀況同銷情，質疑佢嘅真正表現。
有中環茶友就話，恒大一年賣幾千億元人仔嘅樓，佢嘅項目有唔少係三四線城市或邊緣地區，要搵幾個滯銷個案唔難，呢種狀態相信過去幾年都係咁，所以估佢嘅股價表現，唔可以咁簡單睇呢啲所謂「直擊」報道，更加重要嘅係佢背後嘅大戶籌碼。
民企國企係兩個遊戲
恒大由上市到依家，一直同城中富豪關係密切，呢排大戶全部銀彈充足，要用三幾百億炒嘢無乜難度，空軍如果要同佢開戰，咁部署同彈藥都唔少得。茶友留意到，恒大股價飊升，但沽空盤未明顯收斂。
佢話做得空軍，必然有番咁上下技術，佢哋唔會死坐，到位就先行平倉，到高位又再沽過，實行且戰且走，策略好似野狼襲擊大水牛，有機會就撲上去咬佢兩啖，呢種戰術係想令大水牛精神長期緊張，最後崩潰失去戰意，咁佢就大快朵頤，所以大戶同空軍鬥法，大家都係要猛計數。
從散戶角度嚟講，呢啲大隻佬打交係高難度動作，如果自己覺得身型夠靈活，可以走埋去執吓着數，低買高沽，博食吓肉碎，但做鱷魚蝨乸，就真係要隨機應變，隨時預咗止蝕。
茶友嘅講法，多少都解釋咗買民企內房同買龍頭股嘅分別，好似買中國海外(688) 、華潤置地(1109) ，佢一年低位跌到去20元邊，而家升到高位26.75元，升幅三成，雖然都幾好，但係同恒大倍升相差好遠，但國企同民企兩者股東背景好唔同，風險差好遠，玩緊嘅係唔一樣嘅遊戲。
人民幣可能擴波幅
大市升咗三日後炒埋啲落後板塊，開始出現調整，恒指收報27531，跌咗76點，成交855億元。好多先前升得多嘅股份都回吐。
內地媒體稱，中國人民銀行可能會擴大人民幣交易區間，允許人民幣兌美元較中間價上漲或下跌不超3%，高過目前嘅2%。呢個係匯改嘅正常進程，但要小心擴大波幅初期，人仔會較波動。
陸羽仁
金融High Tea 舊文
來源 source: http://hdfin.stheadline.com
