中環在線：吸引唔到人才 馬化騰問責奶媽
■馬化騰話香港對高科技唔再係「high tech揩嘢」。路透社
騰訊（700）主席馬化騰近月頻頻在港公開亮相，噚日就出席創科論壇，認真落力推動本港創科發展。佢喺論壇上笑住講，早前向特首林鄭月娥提議，如果官員無法吸引更多人才嚟香港，就應該問責！
「問責論」隨即惹來哄堂大笑，不過坐喺台下嘅創科局局長楊偉雄就未必笑得出嘞。
娥特：唔可以隨便炒人
馬化騰話，世上沒有隨隨便便嘅成功，認為政府應吸引更多人才來港，仲同林鄭提議，如果官員做唔到就要問責，認為有壓力先有成果。佢笑住話，當時林鄭只係回應「唔可以隨隨便便炒人」喎，相信楊偉雄聽完林太嘅回應後，應該安樂曬啦。
識廣東話嘅馬化騰，指香港以前對高科技嘅態度係「high tech揩嘢，low tech撈嘢」，認為高科技嘢好大機會撞板。但佢笑話，𠵱家嘅香港係「空氣中都感受到科技」，直呼好興奮，提議林太可以考慮推更多政策留人才，「（譬如）是否有政策本地請一個科技人才，配一個外地人呢？」
佢仲透露早前同信置（083）執行董事黃永光見面，對方提到家族喺新加坡首富地位，就快要被移民到當地嘅facebook聯合創辦人比薩韋林（Eduardo Saverin）追過，嚇到父親、即信置主席黃志祥直情飛埋去以色列，物色投資機會。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
