中環在線：十九大累金融「國家隊」冇假放
中共將於10月18日喺北京召開十九大，今年有近半中共高層換屆，習大大揸大旗當然尤其緊張，今次仲搞著一班金融界「國家隊」嘅打工
仔，講到明冇得放假！
每年開大會嘅敏感日子當然有唔少維穩工作，先前阿爺就已經講到明，要上下一心營造「良好的社會環境和輿論環境」，一片和諧咁先開到個靚會。和諧嘅層面仲好廣闊，就連金融市場都不容有失。
所有風險要提早上報
試諗嚇，如果無啦啦A股大跌、人民幣急插，真係政要開會都冇心機喇，所以噚日市場傳出，中國證監會今個月已經要求證券同期貨經營機構，早早索定有乜潛在危機，好似流動性風險、違約風險、信用風險等等，查到乜都要10月前上報，總之十九大前前後後，資本市場都唔可以有乜𠵱鬱。唔好以為交完功課就可以走人呀，一班負責人十九大期間仲一律不得休假、出國、出差，慎防有乜突發事發生。
不過，香港一班中環打工仔就唔使咁驚，因為有中資機構高層就話，十九大都係動用開國家隊，未排到佢哋嘅。其實細心啲睇，阿爺已經率先做咗唔少準備工夫，好似人民幣咁，今年以來唔聲唔聲已經升咗6%，真係俾人沽都唔驚喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
