收市閒情：揀拍拖定買樓？
■有人計過數，每年「拍拖使費」入門價8萬銀，如果拍6年連通脹，折實50萬。 資料圖片
我係James。
細個嘅時候，老竇同我講，「讀書時唔好拍拖，努力讀書就可以出人頭地」。人生果然係由一個再一個謊言堆砌而成！結果書我讀咗，Degree我都讀埋，工我係有呀，
都唔錯呀，一個月幾萬蚊，係死唔去，但我咪又係買唔到樓？
「喂喂，政府話出首置上車盤呀，仲係市價一半，機會嚟啦！」女朋友阿怡興奮咁講。
「傻瓜，林鄭話要同發展商買現成單位，大佬呀，香港得番地產可以賺大錢，平價賣畀你就一定冇可能，政府貴一貴咁接貨，畀發展商提早套現，官商關係咁密切呀？好危險啫。好嘢唔畀你就當然，仲要有貨都唔會畀多你。」可能我太冷靜，由阿怡眉頭眼額，我Feel到佢有啲不滿。「嘩，仲有共享房屋、貨櫃屋……都可以幫到人啩。」
呢啲乜屋物屋，或者可以解燃眉之急，不過大家掉轉諗。今時今日2017年，人人用智能手機、未來世界已經係講緊人工智能講AI，但睇嚇香港人嘅生活質素，變成點？變成要行番N年前條路，起臨時徙置區呀！「你講起就忟憎，明明就係貨櫃屋，將佢變咗貨櫃，就變成『型格貨櫃屋』。仲有呀，政府仲敢帶頭講『共享』？你連Uber都打壓、GobeeBike都話犯法，你仲同我講共享。」
結果我嘅忟憎，好明顯令到阿怡好無癮，「去食飯啦。」食一餐飯，又食咗300銀，我計過呀，一個月拍拖使費用咗我4,000幾銀，一年即係近5萬蚊。最近我睇過一篇文章，計過數，話每年「拍拖使費」入門價都8萬銀，如果拍6年連通脹，折實50萬。
50萬，再加埋自己積蓄，100萬首期冇難度！細個老竇教，讀完書先好拍拖；計我話，今時今日家長應該講，「買咗樓先好拍拖」，因為港男買唔到樓，其中一個原因，好可能係因為有女朋友。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
