【大茶飯】揭亞洲聯合基建喪炒之謎（青冰）
港股今年累積升幅三成，已教人如癡如醉，如果有隻股票半個月狂升四成，足夠你死心塌地吧，講緊嘅就係低調基建股亞洲聯合基建（711）。
恒指上周五繼續高位橫行，但個股卻炒得火熱，當中亞洲聯合基建成功突圍而出，單日搶高19%，更打入十大升幅榜。正所謂空穴
來風，未必無因，甚麼原因令集團突然發力呢？青冰聽到路邊社消息，話亞洲聯合基建好事近，吸引聰明錢瘋搶，究竟甚麼好消息具備十足爆炸性？其實可從公司歷史背景搵到答案。
亞洲聯合基建前稱俊和，老牌建築股一隻，相信戰友一定聽過，創辦人彭氏家族於2014年將公司賣盤予央企中國城建，成功升呢，但好景不常，中國城建因為出現財政問題，導致股權再度出現變化，彭氏家族最終於2016年底，以每股1.08元提出全購，重新奪回控股權，最新持股超過七成。
彭氏家族再度出手，相信離不開兩個原因︰第一，一手湊大、辛苦經營的業務，原本諗住可以嫁個有錢人，最終天氣不似預期，用真金白銀收拾殘局，實屬人之常情；第二，正所謂一不離二，既然彭氏家族有甩手的經驗，將股權收集然後再度尋找新買家，合情合理，再配合股價近期瘋炒，整個畫面非常清晰了。
亞洲聯合基建近期強攻一帶一路項目，首先在新加坡收購建築工程諮詢公司，繼而與央企中國能源建設旗下中國葛洲壩合作，在一帶一路沿線國家進行項目合作，可以視為首家港資一帶一路概念股，成為內地企業併購對象，絕不為奇。
雖然話隻野累積升幅已多，但現價與每股NAV 1.37元仍有一段距離，還未計算殼價，與其高追啲騰訊阿里恆大旗下概念股，不如逢低吸納搏下呢隻，話唔定會有意想不到的效果。
Fb個人專頁 http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
