智取大市：港交所抽爆機？
■傳港交所向政府要求取消或削減股票印花稅，如港交所因而炒起，證明升市未完。 資料圖片
傳港交所（388）向政府要求取消或削減股票印花稅單嘢，值得一談。
目前港股買賣雙方都要繳納每宗交易金額0.1%作印花稅，A股只係向賣方單邊收取0.1%，減半即係同A股睇齊
，係鼓勵買家多過賣家嘅聰明政策，稍為利好港股。
如果係取消印花稅，就唔同咁講法。目前中央結算費加埋港交所徵收交易徵費等等，只佔交易額0.0177%，對於有證券牌嘅投行而言，自己買賣毋須畀傭，只要冇埋印花稅，買賣就幾乎冇成本，港股就有潛質進行高頻交易。你可以話，港股係大陸佬玩曬，興大手暴力入市，algo trading冇用武之地，唔能夠將美股情況套用於港股。不過，今日係咁，唔代表他朝都係咁，只要成本夠低，高頻交易遲早用得著，到時日均成交2,000億有何奇。
取消印花稅，對於香港人嚟講可謂政治極不正確。喺香港地頭買賣股票竟然毋須交稅（美國都有徵收股息稅），講緊2016/17財政年度股票印花稅收入236億元，等同將屬於港人嘅稅收，轉移到大戶（包括強國大戶）手上，以陰謀論咁計，就變咗政治「極之正確」，邊個最著數諗一諗就知，你懂的。取消印花稅嘅決定落喺財政司手上，只要敢做就得，而外滙基金亦可增持港交所作為取消印花稅嚟「對沖」。
以港交所上周五收市價作起步計，由高位回落咗升幅嘅0.618倍黃金比率作為止蝕，可一博。以今轉升浪玩法，只要有疑幻疑真嘅消息，都足夠抽爆機，港交所炒得起就證明升市未完，如果咁都炒唔起就證明市況走樣，亦可作為後市溫度計。
原先承接上期講股市長遠好淡因素嘅文章將會順延，敬請見諒。
晉佳
智取大市 - 晉佳 舊文
來源 source: http://hk.apple.nextmedia.com
